لیاقت پور کو ضلع کا درجہ دینے سمیت تمام بنیادی مسائل حل کریں گے،سید حامد سعید کاظمی

رحیم یارخان(اُردو پوائنٹ اخبارتازہ ترین - اے پی پی۔ 19 دسمبر2023ء) سابق وفاقی وزیر مذہبی امور صاحبزادہ سید حامد سعید کاظمی نے پاکستان پیپلز پارٹی میں دوبارہ شمولیت کے بعد حلقہ این اے 169 اور ذیلی صوبائی حلقوں میں پارٹی امیدواروں کی انتخابی مہم شروع کر دی ہے سیاسی اجتماع سے خطاب کرتے ہوئے سید حامد سعید کاظمی نے کہا کہ انہیں پاکستان پیپلز پارٹی کی مرکزی قیادت نے عزت بخشی ہے جبکہ مخدوم سید احمد محمود بھی مسلسل ان سے رابطہ میں تھے اس لیئے انہوں نے دوستوں کی مشاورت سے دوبارہ پاکستان پیپلز پارٹی جوائن کی ہے۔

انہوں نے کہا کہ حلقہ این اے 169 سے پارٹی کے امیدوار مخدوم سید مرتضیٰ محمود ستارہ امتیاز ہونے کی حیثیت سے لیاقت پور کے عوام کی عزت اور وقار میں اضافہ کا باعث بنیں گے اور لیاقت پور کو ضلع کا درجہ دینے سمیت تمام بنیادی مسائل حل کریں گے ۔

(جاری ہے)

انہوں نے اپنے معتقدین، مریدین اور حلقہ احباب کو ہدایت کی کہ وہ قومی اسمبلی کے حلقہ این اے 169 سے مخدوم سید مرتضیٰ محمود، صوبائی حلقہ پی پی 255 سے سردار غضنفر علی لنگاہ، پی پی 256 سے قاضی احمد سعید اور پی پی 257 سے میاں اسلام اسلم کی بےلوث اور مکمل حمایت کریں اور انہیں کامیاب کروائیں۔

سابق گورنر و صدر پاکستان پیپلز پارٹی چنوبی پنجاب مخدوم سید احمد محمود نے کہا کہ لیڈر وہ نہیں ہوتا جو پولیس کے ذریعے مخالفین اور مظلوموں پر جھوٹے مقدمات درج کرائے انہوں نے کہا کہ چولستانیوں کو میرٹ پر زمین کی الاٹمنٹ کروائی جائے گی لیاقت پور کے عوام کا معیار زندگی بہتر بنانے کے لیئے پاکستان پیپلز پارٹی اور یہاں سے کامیاب ہونے والے نمائندگان بھرپور کردار ادا کریں گے ۔انہوں نے کہا کہ مخدوم مرتضی کو کامیاب کر کے لیاقت پور کے عوام فخر محسوس کریں گے ۔\378