ذاتی طور پر چاہتا ہوں پرویز الٰہی باہر آئیں اور الیکشن لڑیں، شافع حسین

گجرات میں میرے مقابلے میں آصف زرداری نے امیدوار نہ کھڑا کرنے کی ذمہ داری لی ہے،جنرل سیکرٹری (ق)لیگ

پیر 8 جنوری 2024 21:35

لاہور(اُردو پوائنٹ اخبارتازہ ترین - این این آئی۔ 08 جنوری2024ء) پاکستان مسلم لیگ (ق)پنجاب کے جنرل سیکرٹری چودھری شافع حسین نے کہا ہے کہ اداروں کو بلیک میل کر کے حکومت میں آنے کا ٹرینڈ غلط ہے، میں ذاتی طور پر چاہتا ہوں پرویز الٰہی باہر آئیں اور الیکشن لڑیں،گجرات میں میرے مقابلے میں آصف زرداری نے امیدوار نہ کھڑا کرنے کی ذمہ داری لی ہے۔شافع حسین نے کہا کہ ہمیشہ یہی کہا ہے چودھری برادران کو اکٹھے چلنا چاہیے، پرویز الٰہی فیملی نے دو سال پہلے خود ہی فیصلہ کر لیا تھا سیاست اپنی اپنی کرنی ہے، پاکستان میں اس وقت فیک ٹرینڈز چلا کر کنفیوژن پیدا کی جا رہی ہے۔

انہوں نے کہا کہ گجرات میں میرے مقابلے میں آصف زرداری نے امیدوار نہ کھڑا کرنے کی ذمہ داری لی ہے۔شافع حسین نے کہا کہ ہمارے حمایتیوں کو بیرون ممالک سے دھمکی آمیز کالیں کی جا رہی ہیں، لوگوں کو ہماری حمایت سے روکنے کیلئے پیسوں کی آفرز کی جا رہی ہیں۔

(جاری ہے)

انہوں نے کہا کہ شجاعت حسین کے بھائی وجاہت حسین نے خود حلقہ این اے 62 اور 63 میں مسلم لیگ (ن) کے ساتھ سیٹ ایڈجسٹمنٹ سے انکار کیا ہے، وجاہت حسین کے بیٹے حسین الٰہی اور موسی الٰہی مسلم لیگ (ق) کے ٹکٹ پر الیکشن لڑیں گے۔انہوںنے کہا کہ سالک حسین اور میں سیاست میں نئے نہیں، 2004 سے پرویز الٰہی اور شجاعت حسین کے الیکشن لڑتے رہے ہیں۔