پیپلز پارٹی غریب کے دل کی آواز کو سمجھتی ہے،مجھے معلوم ہے غربت کا کیا عالم ہے‘ آصف زرداری

تلہ گنگ (اُردو پوائنٹ اخبارتازہ ترین - این این آئی۔ 04 فروری2024ء) سابق صدر مملکت و پاکستان پیپلز پارٹی پارلیمنٹرینز کے سربراہ آصف علی زرداری نے کہا ہے کہ پیپلز پارٹی غریب کے دل کی آواز کو سمجھتی ہے،مجھے اپنے بیٹے بلاول پر فخر ہے، ہم نے غریبوں کی مدد کیلئے بینظیر انکم سپورٹ پروگرام کارڈ شروع کیا، اس پروگرام کا ہمیں کسی نے نہیں کہا لیکن ہمیں غریبوں کی حالت کا علم ہے،ہماری حکومت میں اتنی غربت نہیں تھی ہمیں الیکشن مہم کا صرف 2دن کا وقفہ ملا ہے ،صرف ان دو دنوں میں الیکشن کی تیاری کر رہے ہیں۔

انتخابی جلسے سے خطاب کرتے ہوئے انہوں نے کہا کہ جس طرح آپ لوگوں نے کم وقت کے نوٹس پر جلسہ میں شرکت کی، اس کیلئے آئی لو یو ، مجھ اس بات کا بھی بخوبی اندازہ ہے کہ تلہ گنگ میری طرف دیکھ رہا ہے ۔

(جاری ہے)

انہوںنے کہا کہ ہمیں یہ ضلع بچانے کے ساتھ یہاں سوئی گیس اور پینے کا صاف پانی مہیا کرنا ہے، ہم نے اپنے دور میں تنخواہوں میں100فیصد اضافہ کیا، آج جتنی مرضی تنخواہیں بڑھا دیں گزارہ مشکل ہورہاہے۔

انہوں نے مزید کہا کہ ضلع تلہ گنگ کی پسماندہ دور کرنے کیلئے یہاں کے مقامی انتظامی افسران کی تعیناتی کرائیں گے، جو مسائل سمجھتے ہوں تاکہ یہ ضلع بھی ترقی کرے۔انہوںنے کہا کہ مجھے معلوم کہ غربت کا کیا عالم ہے، ہم آپ کو خوشحال بنانے کے لیے کام کریں گے اور آپ کو پاکستان میں کمانے کے مواقع دیں گے۔انہوں نے کہا کہ مجھ سے کسی نے بینظیر انکم سپورٹ کارڈ کی مانگ نہیں کی تھی لیکن مجھے معلوم ہے کہ غریب عورتوں کی کیا حالت ہے، آج بھی مجھے معلوم کہ غربت کا کیا عالم ہے کیونکہ جب میں اقتدار میں تھا، اس کے مقابلے میں آج غربت دوگنی ہو گئی ہے۔

ہم نے لوگوں کی خدمت کی لیکن آج یہ حال ہے کہ اشیاء کی قیمتیں آسمان سے باتیں کررہی ہیں، یہ اسی طرح حکومت چلاتے ہیں، یہ آپ کی فصل کو اہمیت نہیں دیتے، اگر میں آپ کی فصلوں کا پیسہ دوں گا تو آپ خوشحال ہوں گے۔انہوں نے کہاکہ خوشحالی آتی ہی اسی وقت ہے جب آس پاس امیر اور بہتر ہوں، یہ نہیں کہ صرف دبئی چلو اور وہاں سے کما کر آئو بلکہ پاکستان میں کما ئواور ہم آپ کو پاکستان میں کمانے کے مواقع دیں گے۔

انہوں نے کہا کہ میں آپ سے دوبارہ ملوں گا اور جو وقت نے آپ سے زیادتیاں کی گئی ہیں، جن لوگوں نے علاقے کے لوگوں کے ساتھ زیادتیاں کی ہیں وہ سب زیادتیاں ختم کریں گے۔آصف زرداری نے مزید کہا کہ مجھے معلوم ہے کہ یہاں پانی کی ضرورت ہے، یہاں انفرا اسٹرکچر کی ضرورت ہے، یہاں کمشنر ور ڈپٹی کمشنر کا دفتر ہونا چاہیے اور ہم آپ کو یہ سب کر کے دیں گے۔