Live Updates

شمالی وزیرستان میں سیکیورٹی فورسز پر بھارتی سرپرستی میں دہشتگرد حملہ

13 جوان شہید، 3 شہری زخمی ، سیکیورٹی فورسز نے 14 خوارج کو جہنم واصل کردیا

محمد علی ہفتہ 28 جون 2025 20:45

شمالی وزیرستان، راولپنڈی(اُردو پوائنٹ اخبارتازہ ترین۔ 28 جون2025ء)شمالی وزیرستان میں سیکیورٹی فورسز پر بھارتی سرپرستی میں دہشتگرد حملہ، 13 جوان شہید، 3 شہری زخمی ، سیکیورٹی فورسز نے 14 خوارج ہلاک کر دیئے۔شمالی وزیرستان کے علاقے میر علی میں سیکیورٹی فورسز کے قافلے پر ایک بزدلانہ حملہ کیا گیا، جو بھارت کی دہشت گرد ریاست نے اپنے ایجنٹ گروہ "فتنہ الخوارج" کے ذریعے کروایا۔

آئی ایس پی آر کے مطابق ایک بارود سے بھری خودکش گاڑی نے سیکیورٹی فورسز کے قافلے کو نشانہ بنانے کی کوشش کی۔ قافلے کی اگلی گاڑی نے بروقت کارروائی کرتے ہوئے حملہ ناکام بنانے کی کوشش کی، تاہم خوارج کی جانب سے دوسری بارود بھری گاڑی قافلے سے ٹکرا دی۔اس افسوسناک اور وحشیانہ حملے میں وطن کے 13 بہادر سپوت جام شہادت نوش کر گئے، جبکہ 3 بے گناہ شہری جن میں دو بچے اور ایک خاتون شامل ہیں، شدید زخمی ہوئے۔

(جاری ہے)

شہدائ میں صوبیدار زاہد اقبال، حوالدار سہراب خان، حوالدار میاں یوسف، نائیک خطاب شاہ، لانس نائیک اسماعیل، سپاہی روحیل، سپاہی محمد رمضان، سپاہی نواب، سپاہی زبیر احمد، سپاہی محمد سخی، سپاہی ہاشم عباسی، سپاہی مدثر اعجاز، سپاہی منظر علی شامل ہیں۔واقعے کے بعد سیکیورٹی فورسز نے علاقے میں بھرپور کلیئرنس اور سرچ آپریشن کیا، جس دوران شدید فائرنگ کے تبادلے میں 14 خوارج واصل جہنم کر دیے گئے۔

کلیئرنس آپریشن تاحال جاری ہے، اور واقعے کے تمام ذمہ داروں کو کیفر کردار تک پہنچایا جائے گا۔آئی ایس پی آر کا کہنا ہے کہ پاکستانی قوم اور سیکیورٹی فورسز بھارتی سرپرستی میں ہونے والی دہشت گردی کے خاتمے کے لیے مکمل یکجہتی اور عزم کے ساتھ کھڑی ہیں، اور ہمارے بہادر سپاہیوں اور شہریوں کی قربانیاں اس قومی عزم کو مزید پختہ کرتی ہیں۔