پی ٹی آئی کے حمایت یافتہ 60 ارکان بکنے کے لیے تیار ہیں

انتخابات میں ن لیگ کو شرمندگی کا سامنا کرنا پڑا ،وزارت عظمی سے متعلق پیپلز پارٹی سب کو نچوڑ لے گی۔فیصل واوڈا

مقدس فاروق اعوان ہفتہ 10 فروری 2024 14:50

پی ٹی آئی کے حمایت یافتہ 60 ارکان بکنے کے لیے تیار ہیں

اسلام آباد (اُردو پوائنٹ اخبارتازہ ترین۔ 10 فروری2024ء) سابق وفاقی وزیر فیصل واوڈا نے دعوی کیا ہے کہ پی ٹی آئی کے حمایت یافتہ 60 ارکان بکنے کے لیے تیار ہیں جبکہ 20 25 ارکان بکنے کو تیار نہیں۔اے آر وائی نیوز کے مطابق فیصل واوڈا نے کہا کہ تجزیے میں جو نمبر دیے تھے اس کے قریب آگئے ہیں، انتخابات میں ن لیگ کو شرمندگی کا سامنا کرنا پڑا ،وزارت عظمی سے متعلق پیپلز پارٹی سب کو نچوڑ لے گی۔

فیصل واوڈا نے مزید کہا کہ ن لیگ 80 82 کے نمبر تک پہنچ جائے گی ،پرسوں کہا تھا میچ میں ایک اوور ٹینس بال کا ہوگا۔ن لیگ اس پر بھی چھکا نہیں مار سکے گی۔سابق وفاقی وزیر نے آزاد امیدواروں کے حوالے سے دعوی کیا کہ 35 ایسے امیدوار ہیں جن کا پی ٹی آئی سے کوئی تعلق نہیں۔پی ٹی آئی کی حمایت یافتہ ارکان کی تعداد 60 ہے جو بکنے کے لیے تیار ہیں۔

(جاری ہے)

قبل ازیں فیصل واوڈا نے عام انتخابات کے نتائج کے حوالے سے کہا کہ توقع یہی تھی کہ آزاد امیدواروں کو برتری ملے گی لیکن آزاد کے کھیل میں جونیجو کے دور کو یاد رکھنا چاہیے اور لولا لنگڑا اقتدار بھی مسلم لیگ (ن) کا آخری اقتدار ہو گا۔

فیصل واوڈا نے نجی ٹی وی سے گفتگو کرتے ہوئے کہا کہ کراچی میں سرپرائز ہو گیا ہے، میں جو کہہ رہا ہوں آئندہ 72 گھنٹوں میں سامنے آ جائے گا، اسلام آباد میں ونٹر فیئر کھل چکی ہے، 12 بجے پتا چل جائے گا، توقع یہی تھی کہ آزاد امیدواروں کو برتری ہوگی، آزاد کے کھیل میں جونیجو کے دور کو یاد رکھنا چاہیے۔ ان کا کہنا تھا کہ کراچی میں متحدہ قومی موومنٹ (ایم کیو ایم) کچھ زیادہ ہی سیٹیں لے رہی ہے، مک گیا شو، گو نواز گو ہو گیا، پیپلز پارٹی آزاد امیدواروں کے ساتھ اپوزیشن میں بیٹھے گی تو 6 سے 7 ماہ میں سارا مک جائے گا۔

انہوں نے کہا کہ لولا لنگڑا اقتدار بھی مسلم لیگ (ن) کا آخری اقتدار ہو گا، اس ملک میں مردے کا ووٹ ڈلتا ہے، مردے کے ووٹ پر انسان جیتتا ہے اور اس کا فیصلہ 5 سال بعد آتا ہے، پی ٹی آئی کی اپنی مقبولیت اور پی ڈی ایم حکومت سے نفرت ایک لہر کی بنیاد بنی۔ فیصل واوڈا کا کہنا تھا کہ پی ٹی آئی کی مقبولیت بھی نفرت کی بنیاد پر بنی ہے، جنہوں نے آئین، قانون اور جمہوریت کا بیڑا اٹھایا ہے، ان سے پوچھتا ہوں جو پنجاب اور خیبرپختونخوا (کے پی) کے اندر الیکشن نہ کروا کر آپ نے اب تک ان کی سزا اور جزا کا کیا کیا۔