Live Updates

این اے 121 سے منتخب آزاد امیدوار وسیم قادر مسلم لیگ ن میں شامل

پی ٹی آئی کے حمایت یافتہ امیدوار نے الیکشن میں ن لیگی رہنماء شیخ روحیل اصغر کو ہرایا تھا

ساجد علی اتوار 11 فروری 2024 19:19

این اے 121 سے منتخب آزاد امیدوار وسیم قادر مسلم لیگ ن میں شامل

لاہور ( اُردو پوائنٹ اخبارتازہ ترین۔ 11 فروری 2024ء ) قومی اسمبلی کے حلقہ این اے 121 لاہور سے منتخب آزاد امیدوار وسیم قادر مسلم لیگ ن میں شامل ہوگئے۔ تفصیلات کے مطابق وسیم قادر کی پاکستان مسلم لیگ (ن) کی سینیئر نائب صدر اور چیف آرگنائزر مریم نواز شریف سے ملاقات ہوئی، جس کے بعد لاہور سے نومنتخب رکن قومی اسمبلی اور پی ٹی آئی لاہور کے جنرل سیکرٹری وسیم قادر مسلم لیگ (ن) میں شامل ہو گئے۔

بتایا گیا ہے کہ پاکستان مسلم لیگ (ن) کے رہنما ملک سیف الملوک کھوکھر بھی اس موقع پر موجود تھے، اس دوران وسیم قادر نے پاکستان مسلم لیگ (ن) کے قائد محمد نواز شریف پر مکمل اعتماد کا اظہار کیا اور کہا کہ حلقہ کے عوام اور دوستوں کی مشاورت سے مسلم لیگ (ن) میں شامل ہو رہا ہوں۔

پہلا لوٹا،،، حلقہ این اے 121 سے پی ٹی آئی کے نومنتخب ایم این اے وسیم قادر کی مریم نواز سے ملاقات، ن لیگ میں شامل،،،
انہوں نے شیخ روحیل اصغر کو شکست دی تھی۔#PTIWon #ElectionResults pic.twitter.com/OJZOexiUYN
— Abid Malik (@iamabidmalik) February 11, 2024

دوسری طرف آزاد حیثیت میں صوبائی حلقہ پی پی 280 سے رکن پنجاب اسمبلی منتخب ہونے والے سردار شہبا ب الدین سہڑ نے چھینہ گروپ سے تعلق کی تردید کرتے ہوئے ن لیگ میں شمولیت کی خبر جھوٹ قرار دے دی، اپنے ایک بیان میں انہوں نے کہا کہ میں بانی پی ٹی آئی عمران خان کی حمایت سے آزاد منتخب ہوا ہوں، میں بانی پی ٹی آئی عمران خان کے ساتھ کھڑا تھا اور آئندہ بھی کھڑا رہوں گا، میرے چھینہ گروپ سے تعلق اور (ن) لیگ میں شمولیت کے حوالے سے میڈیا میں چلنے والی خبریں جھوٹی ہیں۔

(جاری ہے)

جیو کا جھوٹا بیانیہ دم توڑ گیا ایم پی اے لیہ پی پی 280 سردار شہاب الدین سیہڑ نے عمران خان کے ساتھ کھڑا رہنے کا اعلان کرتے ہوئے جیو کو جھوٹا قرار دے دیا pic.twitter.com/puF3ezjKaO
— Fazal Samtiah (@FazalSamtiah) February 11, 2024

بتایا جارہا ہے کہ پنجاب میں حکومت سازی کے لیے پاکستان مسلم لیگ ن اور استحکام پاکستان پارٹی نے صوبائی اسمبلی کا الیکشن جیتنے والے 8 آزاد ارکان سے رابطہ کیا ہے، ن لیگ کے صدر شہباز شریف نے پنجاب اسمبلی کے آزاد ارکان سے رابطہ کیا جب کہ استحکام پاکستان پارٹی کے جہانگیر ترین نے بھی آزاد ارکان سے رابطہ کیا۔

ذرائع کا کہنا ہے کہ آزاد ارکان میں غضنفر چھینہ، شہاب الدین سیہڑ، تیمور امجد، غضنفر قریشی، علی رضا خاکوانی، امیر محمد حسن خیلی، جہانزیب خان کھچی اور صاحبزادہ غزین عباسی شامل ہیں، آزاد ارکان سے ن لیگ اور آئی پی پی قائدین کی آج ملاقاتوں کا بھی امکان ہے۔ ذرائع سے معلوم ہوا ہے کہ مسلم لیگ ن کے صدر شہباز شریف سے رابطے کے بعد پنجاب کے 8 آزاد ارکان کا اجلاس ہوا، اجلاس میں دونوں جماعتوں کے ساتھ رابطوں کے حوالے سے تبادلہ خیال کیا گیا، اجلاس میں آزاد ارکان نے حکومت سازی میں مل کر کردار کرنے پر اتفاق کیا۔