وزیراعظم کی قیادت میں معیشت درست سمت گامزن ہے،رانا مشہوداحمد

ہفتہ 20 اپریل 2024 17:39

پشاور(اُردو پوائنٹ اخبارتازہ ترین - این این آئی۔ 20 اپریل2024ء) چیئرمین یوتھ پروگرام برائے وزیراعظم رانا مشہود احمد نے کہا ہے کہ وزیراعظم کی قیادت میں ملکی معیشت درست سمت کی جانب گامزن ہے۔ایک انٹرویو میں چیئرمین یوتھ پروگرام برائے وزیراعظم رانا مشہود نے کہا کہ آئی ایم ایف ڈیل ناکام بنانے کیلئے شوکت ترین نے وزیر خزانہ پنجاب اور خیبرپختونخوا سے مل کر سازش کی تھی، اب بھی ڈیل ناکام بنانے کیلئے آئی ایم ایف کو خطوط لکھے گئے ہیں۔

(جاری ہے)

انہوں نے کہا کہ وزیراعظم سعودی عرب اور چائنہ کے ساتھ نئے معاہدے کرنے جا رہے ہیں، 2018 کے بعد پاکستان میں کوئی غیر ملکی سرمایہ کاری نہیں ہوئی، آئی ایم ایف کی شرائط 2022 میں طے ہوئیں جسے پورا کرنا پاکستان کی مجبوری ہے۔لیگی رہنما نے کہا کہ آئی ایم ایف کے ساتھ ایک اور ڈیل ہوگی پھر آئی ایم ایف کو 2016 کی طرح خیرباد کہا جائے گا، پی ٹی آئی نے ہمیشہ پارلیمنٹ پر عدم اعتماد کا اظہار کیا ہے، پی ٹی آئی والوں نے کبھی سرکاری مراعات کو نہیں چھوڑا۔رانا مشہود نے کہا کہ پاکستان کے نوجوان پی ٹی آئی کے ساتھ نہیں ن لیگ کے ساتھ ہیں، پی ٹی آئی کے اپنے فارم 45 جھوٹے ثابت ہو چکے ہیں، الیکشن کمیشن اور پی ٹی آئی کے فارم 45 میں زمین آسمان کا فرق ہے۔