ؔڈیتھ سیل میں رکھنے کی تردید،بانی پی ٹی آئی کو اڈیالا جیل کے پریزیڈینشل سوئیٹ میں رکھا گیا ہے’عطاء تارڑ

مسلم لیگ ن کبھی سیاسی انتقام کی خواہشمند نہیں رہی، نہ ہی انتقام لیا ہے‘وزیراطلاعات،بیان جاری

اتوار 21 جولائی 2024 18:55

ی*اسلام آباد (اُردو پوائنٹ اخبارتازہ ترین - آن لائن۔ 21 جولائی2024ء) وفاقی وزیر اطلاعات عطا تارڑ نے بانی پاکستان تحریک انصاف (پی ٹی آئی) کو ڈیتھ سیل میں رکھنے کی تردید کرتے ہوئے کہا ہے کہ بانی پی ٹی آئی کو اڈیالا جیل کے پریزیڈینشل سوئیٹ میں رکھا گیا ہے، مسلم لیگ ن کبھی سیاسی انتقام کی خواہشمند نہیں رہی، نہ ہی انتقام لیا ہے۔اپنے بیان میں عطاتارڑ نے کہا کہ ایک بین الاقوامی جریدے میں آرٹیکل آیا ہے بانی پی ٹی آئی کو ڈیتھ سیل میں رکھا گیا ہے، شہباز شریف کو کمر کی تکلیف کے باوجود بکتر بند گاڑی میں لایا جاتا تھا، بانی پی ٹی آئی کے الفاظ ہیں کہ میں اے سی اتار دوں، ٹی وی بند کردوں گا، دوائیاں نہیں جانے دوں گا، اڈیالہ جیل میں آپ کا ایک پریزیڈنشل سویٹ ہے، بانی پی ٹی آئی کے پاس جیل میں ایکسر سائیز مشین ہے، واک کرنے کیلئے گیلری ہے۔

(جاری ہے)

وزیر اطلاعات نے بنوں سے متعلق گفتگو کرتے ہوئے کہا کہ پی ٹی آئی کی کوشش تھی کہ فوج پر الزام لگ جائے کہ سویلینز کو مار دیا، بنوں میں تاجروں کا ایک احتجاج تھا، اس میں کچھ لوگ ان کے شامل ہوگئے، ان کے لوگوں نے اس جگہ پر پہنچ کر فائرنگ کردی، جس سے بھگدڑ مچی اور 22 افراد زخمی ہوگئے۔عطا تارڑ نے کہا کہ جن بچوں کو گمراہ کیا گیا تھا وہ آج بھی کیسز بھگت رہے ہیں، بنوں والی سازش آپ کے سامنے ہے، کے پی حکومت کچھ بھی کہتی رہے۔