Live Updates

وزیراعلیٰ کی زیر صدارت اجلاس، بارش سے پیدا صورتحال و اقدامات کا جائزہ

13 یا 14 اگست کو دوبارہ بارشوں کا سلسلہ شروع ہونے کا امکان ہے،چیف میٹرولوجسٹ

اتوار 4 اگست 2024 19:25

کراچی(اُردو پوائنٹ اخبارتازہ ترین - این این آئی۔ 04 اگست2024ء) وزیراعلیٰ سندھ کی زیرصدارت بارشوں سے پیدا صورتحال سے متعلق اجلاس ہوا جس میں نکاسی آب و دیگر ضروری اقدامات کا جائزہ لیا گیا۔ترجمان وزیراعلیٰ سندھ کے مطابق اس موقع پر چیف میٹرولوجسٹ سردار سرفراز نے بتایا کہ بارش کا جاری اسپیل آئندہ 24گھنٹوں میںٹوٹ جائے گا۔ چیف میٹرولوجسٹ نے کہاکہ 13 یا 14 اگست کو دوبارہ بارشوں کا سلسلہ شروع ہونے کا امکان ہے۔

اس موقع پر وزیر آبپاشی سندھ نے کہا کہ گڈو بیراج کی صورتحال اطمینان بخش ہے۔

(جاری ہے)

بلوچستان سے بارش کا پانی ابھی سندھ میں داخل نہیں ہوا۔ وزیراعلی سندھ نے کمشنر حیدرآباد کو ہدایت کی کہ بھان سعیدآباد میں بارش کے پانی کی نکاسی کیلیے اقدامات کریں۔ وزیراعلی نے کہا کہ جن شہروں میں پانی کے نکاس کیلیے مشینری چاہیے وہاں فوری بھیجیں۔ ڈائریکٹر جنرل پی ڈی ایم اے نے کہا کراچی کی انتظامیہ کو ڈی واٹرنگ مشینیں مہیا کر دی گئی ہیں۔ میئر کراچی مرتضی وہاب نے کہا کہ کراچی میں 207 نشیبی علاقے ہیں۔ انکے مطابق ضلع جنوبی میں 56، غربی 17، وسطی 22، ملیر 32، کورنگی 16، کیماڑی 26 اور شرقی میں 38 نشیبی علاقے ہیں۔ وزیر بلدیات سندھ نے کہا کہ شدید بارشوں کی صورت میں بلدیاتی ادارے متحرک رہیں گے۔