قومی اسمبلی میں مختلف سیاسی جماعتوں کے سربراہان اور رہنمائوں کا امام مسجد نبوی کے دورہ پاکستان اور ایوان آمد پر بھرپور خیرمقدم

اسلام آباد (اُردو پوائنٹ اخبارتازہ ترین - اے پی پی۔ 09 اگست2024ء) قومی اسمبلی میں مختلف سیاسی جماعتوں کے سربراہان اور رہنمائوں نے امام مسجد نبوی کے دورہ پاکستان اور ایوان آمد پر ان کا بھرپور خیرمقدم کرتےہوئے کہا ہے کہ مسجد نبوی کے امام کی تشریف آوری سے پاک سعودی تعلقات کومزید تقویت ملے گی،ان رہنمائوں نے مسلم امہ کے مسائل کے حل کے لئے سعودی عرب اور پاکستان کے اہم کردار سے استفادہ کرنے کی ضرورت پر بھی زور دیا۔

جمعہ کو قومی اسمبلی کے اجلاس میں جے یو آئی (ف) کے سربراہ مولانا فضل الرحمن نے مسجد نبوی کے امام کا خیرمقدم کیا اور کہاکہ آج معزز مہمان پارلیمنٹ میں آئے ہیں۔ اس ایوان میں ماضی میں یاسر عرفات ، طیب اردوان اور دوسرے بین الاقوامی زعماتشریف لائے تھے۔

(جاری ہے)

مسجد نبوی کے امام ہمارے امام ہیں ۔ معزز مہمانوں کی آمد کی خوشی میں روایات کو برقرار رکھتے ہوئے ہمیں داخلی سیاست کے معاملات کو اہمیت نہیں دینی چاہیے۔

ہمیں پاک سعودی عرب تعلقات، حرمین شریفین کی اہمیت کو اجاگر کر نا چاہیے۔ مسجد نبوی کے امام کی تشریف آوری سے پاک سعودی تعلقات کومزید تقویت ملے گی۔انہوں نے کہاکہ ہم دنیامیں سعودی عرب کو پہلی ترجیحی دیتے ہیں۔ کشمیر ، برما، غزہ اور فلسطین کے مسائل کوپاکستان اور سعودی عرب مل کر اٹھائیں۔ سعودی عر ب میں صلاحیت ہے کہ وہ عرب لیگ کے پلیٹ فارم سے مسلم امہ کے مسائل کو اجاگر کر کے ان حل میں اپنا کردارادا کرسکتا ہے ۔

انہوں نے ارشد ندیم کو میڈل جیتنے پر مبارکباد دی اور کہاکہ انہوں نے قوم کا سر فخر سے بلند کر دیاہے۔ ہمیں اپنی کمزوریوں کو خود طاقتور بنا کر ملک کو آگے لے جانا ہے۔ایم کیو ایم پاکستان کے رکن قومی اسمبلی مصطفیٰ کمال نے کہا کہ مسجد نبوی کے امام اور ان کے وفد اور سعودی سفیر کا خیر مقدم کرتے ہیں اور ان کا شکریہ ادا کرتے ہیں کہ انہوں نے پاکستان کو عزت بخشی ہے۔

اللہ تعالیٰ نے ان کو ایسی ذمہ داری دی ہے جن پر عام مسلمان کو رشک آتا ہے۔ جضورؐ کامصلیٰ کسی انسان کی محنت اور کوشش سے حاصل نہیں ہوتا جس پر اللہ کا خاص کرم ہو اللہ انہیں یہ سعادت عطا فرماتے ہیں۔ ہم دل کی گہرائیوں سے امام مسجد نبوی ، سعودی سفیر اور سعودی وفد کا خیرمقدم کرتےہیں۔ پاکستان پر جب بھی مشکل وقت آیاسعودی عرب پہلا دوست ملک ہے جوہمارے ساتھ کھڑاہوتا ہے۔

حج انتظامات کے حوالے سے سعودی عرب کے سفیر نے اہم کردار ادا کیاہے جس پر ہم سب ان کے شکر گزارہیں ۔انہوں نے ارشد مجید کو اولمپکس گولڈ میڈل جیتے نے پر مبارک باد دی اور کہاکہ ملک میں ٹیلنٹ موجود ہے اور ضرورت اس امر کی ہے کہ اس ٹیلنٹ کو تلاش اور سنوار کر اس سے بھرپور استفادہ کیاجائے۔ مصطفیٰ کمال نے کہا کہ وہ بلاول بھٹو زرداری کی اس بات سے متفق ہیں کہ سیاستدانوں کو تلخیوں کو بھلا کر 24 کروڑ عوام کے لئے مشکل فیصلے کرنے چاہئیں۔

پختونخوا ملی عوامی پارٹی کے رکن محمود خان اچکزئی نے کہا کہ وہ امام مسجدنبوی ، سعودی عرب کے سفیر اور سعودی وفد کوایوان آمد پر خوش آمدید کہتے ہیں۔ خادم الحرمین شریفین اور آل سعود اسلامی دنیاکے ذمہ دار لوگ ہیں۔ انہوں نے کہا کہ وہ اپنی اور اپنی جماعت کی طرف سے شہزاد محمد بن سلمان کو ایران سعودی تعلقات میں بہتری کے لئے خدمات پر مبارکباد دیتے ہیں۔

انہوں نے کہا کہ امام مسجد نبوی نے آج ایوان میں جو تلاوت کی ہے ا س میں اللہ کی رسی کو مضبوطی سے تھامنے کی ہدایت کی گئی ہے ۔اسرائیلی وزیر اعظم بنجمن نیتن یاہو انسانیت کاقاتل ہے اور ہمیں اس بات سے اتفاق کرنا ہو گا ۔اسلامی دنیا کی طرف سے متفقہ فیصلہ ہونا چاہیے کہ نیتن یاہو کے خلاف بین الاقوامی جرائم کی عدالت میں مقدمہ چلانا چاہیے۔