محمد حارث اے سی سی مینز ٹی ٹونٹی ایمرجنگ ایشیا کپ میں پاکستان شاہینز کی قیادت کریں گے

لاہور (اُردو پوائنٹ اخبارتازہ ترین - این این آئی۔ 07 اکتوبر2024ء) پاکستان کے لیے 9ٹی ٹونٹی اور چھ ون ڈے انٹرنیشنل میچز کھیلنے والے محمد حارث18 اکتوبر سے اومان میں شروع ہونے والے اے سی سی مینز ٹی ٹونٹی ایمرجنگ ایشیا کپ میں پاکستان شاہینز کی قیادت کریں گے۔ پاکستان شاہینز 16اکتوبر کو عمان روانگی سے قبل 11سے 15اکتوبر تک کراچی کے حنیف محمد ہائی پرفارمنس سینٹر میں ٹریننگ کیمپ میں حصہ لے گی۔

عبدالصمد، احمد دانیال، یاسر خان اور زمان خان پہلی بار پاکستان شاہینز کی نمائندگی کریں گے۔ عبدالصمد نے حال ہی میں ہونے والے بحریہ ٹائون چیمپئنز ون ڈے کپ میں یو ایم ٹی مارخور کے لیے نمائندگی کی اور 122.88کے اسٹرائیک ریٹ سے اسکور کیا۔ نورپور لائنز کی طرف سے کھیلتے ہوئے احمد دانیال نے 10وکٹیں حاصل کیں جبکہ الائیڈ بینک اسٹالینز کی طرف سے یاسر اور زمان نے بالترتیب چار اور دو میچز کھیلے۔

(جاری ہے)

ایونٹ میں آٹھ ٹیمیں حصہ لیں گی ۔ ان ٹیموں کو دو گروپس میں تقسیم کیا گیا ہے۔ تمام میچ مسقط کے اومان کرکٹ اکیڈمی گرائونڈ میں ہوں گے۔گروپ اے میں افغانستان اے، بنگلہ دیش اے، ہانگ کانگ اور سری لنکا اے جبکہ گروپ بی میں دفاعی چیمپئن پاکستان شاہینز بھارت اے، اومان اور یو اے ای شامل ہیں۔حارث کی زیرقیادت شاہینز کا مقابلہ 19اکتوبر کو اپنے افتتاحی میچ میں گزشتہ سال کی فائنلسٹ انڈیا ایسے ہوگا۔

ٹورنامنٹ میں شاہینز کا دوسرا مقابلہ 21 اکتوبر کو میزبان اومان کے خلاف ہوگا اس کے بعد اس کا آخری گروپ میچ 23 اکتوبر کو متحدہ عرب امارات کے خلاف ہوگا۔ہر گروپ سے سرفہرست دو ٹیمیں 25اکتوبر کو ہونے والے سیمی فائنل کے لیے کوالیفائی کریں گی۔ فائنل 27 اکتوبر بروز اتوار کو ہوگا۔عثمان واہلہ ڈائریکٹر پی سی بی انٹرنیشنل کا کہنا ہے کہ پاکستان شاہینز اے سی سی مینز ٹی ٹونٹی ایمرجنگ ایشیا کپ میں پی سی بی کی ابھرتی ہوئی صلاحیتوں کا مظاہرہ کرنے کے لیے پرجوش ہیں۔

ہم رکن ممالک میں کھلاڑیوں کی ترقی کو فروغ دینے کے لیے ایشین کرکٹ کونسل کی مسلسل کوششوں کو سراہتے ہیں۔ ابھرتی ہوئی ٹیموں کے ٹی ٹونٹی ایشیا کپ جیسے اقدامات نوجوان صلاحیتوں کے فروغ اور بہترین کارکردگی کے مواقع پیدا کرنے کے لیے اہم ہیں۔پاکستان شاہین اسکواڈ میں محمد حارث (کپتان )، عبدالصمد، احمد دانیال، عرفات منہاس، حیدر علی، حسیب اللہ ، مہران ممتاز، محمد عباس آفریدی، محمد عمران جونیئر، عمیر بن یوسف، قاسم اکرم، شاہنواز دھانی، سفیان مقیم، یاسر خان اور زمان خان شامل ہیں جبکہ ٹیم مینجمنٹ میں عمر رشید (ہیڈ کوچ /منیجر)، عمران فرحت (بیٹنگ کوچ)، رفعت اللہ مہمند (فیلڈنگ کوچ)، عثمان ہاشمی (انالسٹ ) اور سید محمد اسد شامل ہیں۔