پیپلز پارٹی کے غنڈے نے الیکشن کمیشن کے دفتر میں سارا ریکارڈ جلا دیا: حلیم عادل شیخ

جمعہ 11 اکتوبر 2024 14:30

کراچی(اُردو پوائنٹ اخبارتازہ ترین - این این آئی۔ 11 اکتوبر2024ء) پاکستان تحریکِ انصاف سندھ کے صدر حلیم عادل شیخ نے الزام عائد کیا ہے کہ پیپلز پارٹی کے غنڈوں نے الیکشن کمیشن کے دفتر میں سارا ریکارڈ جلا دیاہے۔کراچی کے قومی اسمبلی کے حلقے این اے 231 کے 4 پولنگ اسٹیشنز پر دوبارہ گنتی کے معاملے پر میڈیا سے گفتگو میں حلیم عادل شیخ نے کہا کہ جمعہ کو الیکشن کمیشن میں بیلٹ باکس اور دیگر ریکارڈ بھی جلا دیا گیا اور پی ٹی آئی کے امیدوار ایڈووکیٹ خالد محمود پر تشددبھی کیا گیا۔

انہوں نے کہا کہ پیپلز پارٹی کے افراد میرا لیپ ٹاپ بھی چھین کر لے گئے، ہار کے خوف سے پیپلز پارٹی نے الیکشن کمیشن دفتر پر دھاوا بولا ہے۔پی ٹی آئی رہنما حلیم عادل شیخ نے کہا کہ پولیس کی موجودگی میں غیر قانونی کارروائی کی گئی ہے۔

(جاری ہے)

آزاد امیدوار خالد محمود کے بیٹے ولید احمد نے کہا کہ جیسے ہی گنتی شروع ہونے لگی تالے لگا دیئے گئے، دفتر کے اندر سے ایک بندے نے تالا کھولا۔

ولید احمد نے الزام عائد کیا کہ مجھے مارا گیا، میرا لیپ ٹاپ اور موبائل فون چھین لیا گیا۔واضح رہے کہ الیکشن ٹریبونل نے این اے 231 کے 4 پولنگ اسٹیشنز پر دوبارہ گنتی کا حکم دیا تھا۔این اے 231 کے 4 پولنگ اسٹیشنز میں جمعہ کو دوبارہ گنتی کے آغاز سے قبل پیپلز پارٹی کے امیدوار عبدالحکیم بلوچ ریجنل الیکشن کمشنر کے دفتر پہنچے تو ان کی پولیس کے ساتھ تلخ کلامی ہوگئی تھی۔تلخ کلامی عبدالحکیم بلوچ کے وکیل کو اندر جانے سے روکنے پر شروع ہوئی۔