شیخ عمر ریحان کی وزیر خزانہ اور وزیر مملکت سے ملاقات

جمعہ 11 اکتوبر 2024 23:05

ُکراچی(اُردو پوائنٹ اخبارتازہ ترین - آن لائن۔ 11 اکتوبر2024ء) پاکستان وناسپتی مینوفیکچررز ایسوسی ایشن (پی وی ایم ای) کے چیئرمین شیخ عمر ریحان نے اسلام آباد میں وفاقی وزیر خزانہ و ریونیو سینیٹر محمد اورنگزیب اور وزیر مملکت برائے خزانہ، ریونیو اور پاور علی پرویز ملک سے ملاقات کی۔ جس میں گھی اور کوکنگ آئل انڈسٹری کو درپیش مسائل پر تفصیلی تبادلہ خیال کیا گیا۔

دونوں وزراء نے شیخ عمر ریحان کو یقین دہانی کرائی کہ گھی اور کوکنگ آئل انڈسٹری کے مسائل کو ترجیحی بنیادوں پر حل کیا جائے گا۔ اس موقع پر چیئرمین پی وی ایم اے شیخ عمر ریحان نے وزیر خزانہ اور وزیر مملکت کی کاوشوں کی تعریف کرتے ہوئے کہا کہ انہوں نے مشکل وقت میں پاکستان کی اقتصادی امور کی ذمہ داریاں سنبھالی جس وقت ملک سنگین معاشی بحران سے گزر رہا تھا، زرمبادلہ کے ذخائر میں کمی، تجارتی خسارہ عروج پر تھا اور بزنس کمیونٹی میں اعتماد کا فقدان تھا اور ٹیکس کی پیچیدگیوں اور ڈالر کی قیمت میں تیزی سے اضافہ کے باعث مقامی انڈسٹری تباہی کا شکار تھی۔

(جاری ہے)

تاہم وزیر خزانہ کی انتھک محنت سے نہ صرف معیشت درست سمت میں گامزن ہوئی بلکہ بزنس کمیونٹی کا اعتماد بھی بحال ہو رہا ہے۔ چیئرمین پی وی ایم اے نے مزید کہا کہ وزیر خزانہ اور وزیر مملکت کی جانب سے گھی اور آئل انڈسٹری سے منسلک مقامی مینوفیکچررز کے ٹیکس اور اسمگلنگ کے مسائل سے آگاہ کیا، جسے انہوں نے سنجیدگی سے سنتے ہوئے فوری اقدامات کے یقین دہانی کرائی ہے۔ شیخ عمر ریحان نے مزید کہا کہ مقامی مینوفیکچررز کو مطلوبہ سہولیات میسر آجائیں تو پاکستان میں مقامی سطح پر خوردنی تیل کی تیاری اور امپورٹ بل کم کیا جاسکتا ہے۔#

Facebook Twitter Google + Share on Whatsapp

شیخ عمر ریحان کی وزیر خزانہ اور وزیر مملکت سے ملاقات

متعلقہ عنوان :

مزید قومی خبریں