ہار کے خوف سے پیپلز پارٹی نے الیکشن کمیشن دفتر پر دھاوا بولا ہے،حلیم عادل شیخ

جمعہ 11 اکتوبر 2024 23:13

کراچی (اُردو پوائنٹ اخبارتازہ ترین - آن لائن۔ 11 اکتوبر2024ء) پاکستان تحریکِ انصاف سندھ کے صدر حلیم عادل شیخ نے الزام عائد کیا ہے کہ پیپلز پارٹی کے غنڈے نیالیکشن کمیشن کے دفتر میں سارا ریکارڈ جلا دیا۔کراچی کے قومی اسمبلی کے حلقے این اے 231 کے 4 پولنگ اسٹیشنز پر دوبارہ گنتی کے معاملے پر میڈیا سے گفتگو میں حلیم عادل شیخ نے کہا کہ آج الیکشن کمیشن میں بیلٹ باکس اور دیگر ریکارڈ بھی جلا دیا گیا اور پی ٹی آئی کے امیدوار ایڈووکیٹ خالد محمود پر تشدد کیا گیا۔

اٴْنہوں نے کہا کہ پیپلز پارٹی کے افراد میرا لیپ ٹاپ بھی چھین کر لے گئے، ہار کے خوف سے پیپلز پارٹی نے الیکشن کمیشن دفتر پر دھاوا بولا ہے۔پی ٹی آئی رہنما حلیم عادل شیخ نے کہا کہ پولیس کی موجودگی میں غیر قانونی کارروائی کی گئی ہے۔

(جاری ہے)

آزاد امیدوار خالد محمود کے بیٹے ولید احمد نے میڈیاسے گفتگو کرتے ہوئے کہا کہ جیسے ہی گنتی شروع ہونے لگی تالے لگا دیے گئے، دفتر کے اندر سے ایک بندے نے تالا کھولا۔

ولید احمد نے الزام عائد کیا کہ مجھے مارا گیا، میرا لیپ ٹاپ اور موبائل فون چھین لیا گیا۔واضح رہے کہ الیکشن ٹریبونل نے این اے 231 کے 4 پولنگ اسٹیشنز پر دوبارہ گنتی کا حکم دیا تھا۔این اے 231 کے 4 پولنگ اسٹیشنز میں آج دوبارہ گنتی کے آغاز سے قبل پیپلز پارٹی کے امیدوار عبدالحکیم بلوچ ریجنل الیکشن کمشنر کے دفتر پہنچے تو ان کی پولیس کے ساتھ تلخ کلامی ہوگئی تھی۔تلخ کلامی عبدالحکیم بلوچ کے وکیل کو اندر جانے سے روکنے پر شروع ہوئی۔#