اوپن یونیورسٹی کے سندھ چیپٹر کا کانووکیشن 17 نومبر کو کراچی میں ہوگا

جمعرات 14 نومبر 2024 17:06

اسلام آباد (اُردو پوائنٹ اخبارتازہ ترین - اے پی پی۔ 14 نومبر2024ء) علامہ اقبال اوپن یونیورسٹی اپنی گولڈن جوبلی تقریبات کے سلسلے میں سندھ چیٹر کا کانووکیشن 17 نومبر کو کراچی میں منعقد کر رہی ہے جس میں سندھ کے مختلف تعلیمی اداروں کے سربراہان، سکولز، کالجز اور جامعات کے اساتذہ، ملک کے نامور صحافی، سیاسی و سماجی شخصیات شرکت کریں گی۔وفاقی وزیر تعلیم خالد مقبول صدیقی اور وائس چانسلر پروفیسر ڈاکٹر ناصر محمود سمسٹر خزاں 2004 تا بہار 2022 کے دوران گریجویٹ ہونے والے طلبہ میں گولڈ میڈلز اور ڈگریاں تقسیم کریں گے۔

(جاری ہے)

تقریب میں طلبہ کے ساتھ ان کے والدین بھی شرکت کریں گے۔وائس چانسلر پروفیسر ڈاکٹر ناصر محمود نے 2024 کو گولڈن جوبلی کا سال قرار دیا تھا اور یہ فیصلہ کیا تھا کہ سال بھر تقریبات منعقد کی جائیں گی جس کا آغاز کانووکیشن سے کیا جائے گا۔ اس حوالے سے طلبہ کی آسانی کے لئے انہوں نے کانووکیشن کو چیپٹر وائز منعقد کرانے کی ہدایات دی تھی۔ اسلام آباد چیپٹر کا کانووکیشن 31 جنوری کو منعقد ہوا تھا، 28اپریل کو پنجاب چیپٹر، 9جون کو خیبر پختونخوا اور 8ستمبر کو بلوچستان چیٹر کا کانووکیشن منعقد کیا گیا تھا اور 17 نومبر کو سندھ چیپٹر کا کانووکیشن منعقد کیا جا رہا ہے۔