ن لیگی امیدواروں کی درخواستیں منظور، اسلام آباد کے تین حلقوں کے کیسز دوسرے ٹریبونلز کو منتقل کر دئیے

الیکشن کمیشن نے پی ٹی آئی کی درخواست مسترد کر دی،الیکشن کمیشن نے اسلام آباد کے قومی اسمبلی کے تینوں حلقوں کے ٹربیونل تبدیلی کیس کا فیصلہ سنا دیا

فیصل علوی منگل 3 دسمبر 2024 14:13

ن لیگی امیدواروں کی درخواستیں منظور، اسلام آباد کے تین حلقوں کے کیسز ..

اسلام آباد(اردوپوائنٹ اخبار تازہ ترین۔ 03 دسمبر 2024) الیکشن کمیشن نے اسلام آباد کے ٹریبونلز کی تبدیلی کے کیس میں پاکستان مسلم لیگ ن کے امیدواروں کی درخواستیں منظور کرتے ہوئے اسلام آباد کے حلقوں کے کیسز دوسرے ٹریبیونل کو منتقل کر دئیے،الیکشن کمیشن نے پی ٹی آئی کی درخواست مسترد کر دی،الیکشن کمیشن نے اسلام آباد کے قومی اسمبلی کے تینوں حلقوں کے ٹربیونل تبدیلی کیس کا فیصلہ سنا دیا۔

الیکشن کمیشن نے اسلام آباد کے قومی اسمبلی کے تینوں حلقوں کے کیسز جسٹس (ر) عبدالشکور پراچہ کے ٹریبیونل کو منتقل کر دئیے۔دریں اثناءسندھ ہائیکورٹ میں الیکشن ٹربیونل نے این اے 236 میں دھاندلی کیخلاف عالمگیر خان کی انتخابی عذرداری مسترد کردی۔الیکشن ٹریبونل کے روبرو این اے 236 میں دھاندلی کیخلاف عالمگیر خان کی انتخابی عذرداری کی سماعت ہوئی، الیکشن ٹربیونل عالمگیر خان کی انتخابی عذرداری کیخلاف درخواست مسترد کردی۔

(جاری ہے)

الیکشن ٹربیونل نے عالمگیر خان کی انتخابی عذرداری کو ناقابل سماعت قرار دے دیا، این اے 236 سے ایم کیو ایم کے سپریم کورٹ کے وکیل و سینئر قانون دان حسان صابر ایڈووکیٹ رکن قومی اسمبلی منتخب ہوئے ہیں۔یاد رہے کہ اس سے قبل الیکشن کمیشن نے اسلام آباد کے ٹربیونل کی تبدیلی سے متعلق مسلم لیگ (ن) کے اراکین قومی اسمبلی طارق فضل چوہدری، انجم عقیل خان اور راجا خرم نواز کی درخواست منظورکی تھی۔

الیکشن کمیشن نے اسلام آباد ٹربیونل کی تبدیلی کامحفوظ فیصلہ سنادیا، اسلام آباد کے تین لیگی اراکین اسمبلی نے ٹربیونل پر تحفظات کا اظہار کیا تھا۔الیکشن کمیشن نے اسلام آباد کے تینوں حلقوں میں ٹربیونل جج تبدیل کرنے کی منظوری دیدی تھی۔ اسلام آباد کے تینوں حلقوں سے جیتنے والے مسلم لیگ ن اور استحکام پاکستان پارٹی کے امیدوار نے ٹریبونل کی تبدیلی کا مطالبہ کیا تھا۔جبکہ تحریک انصاف نے ٹریبونل کی تبدیلی کی مخالفت کی تھی۔