وادی تیراہ، چترال اور دیگر مقامات پر شدید برفباری سے قدرتی حسن نکھر آیا

بیشتر مقامات پر 6سے 8انچ تک برف پڑ چکی ، لواری ٹنل پر صفائی شروع، گاڑیوں کی آمد و رفت جاری

جمعہ 3 جنوری 2025 20:00

خیبر (اُردو پوائنٹ اخبارتازہ ترین - این این آئی۔ 03 جنوری2025ء)وادی تیراہ اور چترال سمیت دیگر مقامات پر شدید برف باری کے بعد قدرتی حسن نکھر آیا جبکہ موسم کی شدت میں بھی اضافہ ہوگیا ۔ مقامی ذرائع کے مطابق شدید برف باری کی وجہ سے لنک روڈ بند ہونے سے مقامی آبادی مشکلات کا شکار ہے اور سردی بڑھنے سے روز مرہ کے معمولات متاثر ہو ہو رہے ہیں۔علاوہ ازیں برف باری کے خوبصورت فطری مناظر دیکھنے کیلئے سیاحوں کی آمد کا سلسلہ بھی جاری ہے۔

دوسری جانب چترال شہر اور مضافات نے بھی برف کی سفید چادر اوڑھ لی ہے اورلوئر چترال کے کالاش ویلیز ، گرم چشمہ ، شیشی کوہ ، گولین میں6سے 8انچ تک برف پڑی ہے، چترال شہر میں 4انچ، آیون میں 2انچ برف پڑ چکی ہے، اسی طرح لواری ٹنل ایریا میں مسلسل برفباری ہو رہی ہے اور اب تک ایک فٹ تک برف پڑ چکی ہے۔

(جاری ہے)

برفباری کے دوران بھی لواری ٹنل روڈ کی صفائی کا کام جاری ہے، پشاور اور اسلام آباد کی مسافر گاڑیاں لواری کے راستے آج صبح چترال پہنچی ہیں۔

ادھر بالائی چترال کے یارخون،کھوت ،ریچ ، تریچ،پھستی وغیرہ جیسے مقامات میں زیادہ برف پڑی ہے ۔ جس کی وجہ سے چترال اپر اور لوئر کے اندرونی راستوں میں آمدورفت متاثر ہو رہی ہے اور ملازمین کو دفاتر پہنچنے میں مشکلات کا سامنا ہے۔برفباری سے سردی کی شدت بڑھ گئی ہے اور لوگ گھروں تک محدود ہوکر رہ گئے ہیں۔ اسی طرح سردی کی وجہ سے جلانے کی لکڑی کی قیمت میں بدستور اضافہ ہو گیا ہے اور فروخت کرنے والے منہ مانگی قیمت وصول کررہے ہیں۔

محکمہ موسمیات کے مطابق خیبر پختونخوا کے بالائی اور میدانی علاقوں میں آئندہ 24گھنٹوں کے دوران موسم خشک رہے گا۔ محکمہ موسمیات کے مطابق گزشتہ رات پشاور میں ہلکی بارش سے خشک سردی میں کمی آئی ہے جب کہ بعض بالائی علاقوں میں برف باری کی بھی اطلاعات موصول ہوئی ہیں۔ آئندہ ہفتے سے موسم سرما کی بارشوں اور پہاڑوں پر برف پڑنے کے کافی امکانات ہیں۔