سندھ کے ساتھ وفاق کی جانب سے سوتیلوں جیسا سلوک کیا جاتا ہے، بلاول بھٹو زرداری

اگر حق ٹھیک طریقے سے نہیں ملتا تو سہولیات فراہم کرنا بہت مشکل ہے، وسائل کی کمی کے لیے پبلک پرائیویٹ پارٹنرشپ کو متعارف کروایا جو کامیابی سے چل رہا ہے؛ چیئرمین پیپلزپارٹی کا تقریب سے خطاب

ساجد علی ہفتہ 11 جنوری 2025 16:45

سندھ کے ساتھ وفاق کی جانب سے سوتیلوں جیسا سلوک کیا جاتا ہے، بلاول بھٹو ..

کراچی ( اُردو پوائنٹ اخبارتازہ ترین۔ 11 جنوری 2025ء ) پاکستان پیپلزپارٹی کے چیئرمین بلاول بھٹو زرداری نے کہا ہے کہ ہمارا خاندان 3 نسلوں سے کراچی کی ترقی میں کردار ادا کر رہا ہے لیکن صوبہ سندھ کے ساتھ وفاقی حکومت ہمیشہ سے سوتیلا سلوک کرتی آئی ہے، وسائل کی تقسیم غیرمنصفانہ ہے اگر حق ٹھیک طریقے سے نہیں ملتا تو سہولیات فراہم کرنا بہت مشکل ہے۔

کراچی میں تقریب سے خطاب کرتے ہوئے انہوں نے کہا کہ سندھ حکومت نے شاہراہ بھٹو کا افتتاح کیا، شہید ذوالفقار علی بھٹو کے دور میں کراچی کی ترقی کے لیے بے پناہ منصوبے دیئے گئے، شاہراہ فیصل سے سٹیل مل تک قائد عوام نے شہر کے انفرا سٹرکچر اور صنعتی ترقی، عوام کو روزگار دلوانے میں انقلابی کام کروایا، اسی طرح بینظیر بھٹو کو جب بھی حکومت کا موقع ملا انہوں نے کراچی پر خاص توجہ دی، ہمیشہ امن و امان قائم کرنے اور شہر کی عوام کو روزگار دلوانے کی کوشش کی۔

(جاری ہے)

بلاول بھٹو زرداری کا کہنا ہے کہ سابق میئر مصطفیٰ کمال سے پوچھا جائے کہ جتنے پیسے صدر آصف علی زرداری نے کراچی کو دیئے اتنے کسی نے نہیں دیئے، یہ منصوبہ ناصرف اس شہر بلکہ پورے صوبے کو ملک سے جوڑے گا، اس کے علاوہ یہ شہر کی عوام کو روزگار بھی فراہم کرے گا، میرے پسندیدہ منصوبے شاہراہ بھٹو کو پبلک پرائیوٹ شراکت داری کے تحت تعمیر کیا جارہا ہے۔

چیئرمین پاکستان پیپلزپارٹی نے کہا کہ پبلک پرائیویٹ شراکت داری کو پاکستان سمیت عالمی سطح پر سراہا گیا، خواہش ہے اسی منصوبے کے تحت صوبے اور خاص طور پر کراچی کے مسائل کا حل نکالنے کے لیے مذکورہ شراکت داری کو فروغ دینا ہوگا، آنے والے وقت میں اس پارٹنرشپ کے تحت شہر کے تمام مسائل کا حل نکالنے کی کوشش کی جائے گی، ہماری ہمیشہ کوشش رہی ہے عوام کو مفت یا کم سے کم قیمت پر سہولت فراہم کی جائے، سندھ حکومت کی وجہ سے 100 روپے کا ٹول ٹیکس رکھا گیا ہے اور امید ہے یہ اتنا ہی رہے گا۔