قائد (ن) لیگ جلد خیبرپختونخوا سے سیاسی مہم کا آغاز کرنیوالے ہیں، کیپٹن (ر) صفدر

مریم نواز خیبرپختونخوا کو بھی تھوڑا وقت دیں، اگر وہ نہیں آتیں تو صوبے کے وزیراعلی کو تھوڑی تربیت دیں، تقریب سے خطاب

ہفتہ 25 جنوری 2025 21:15

پشاور (اُردو پوائنٹ اخبارتازہ ترین - این این آئی۔ 25 جنوری2025ء) مسلم لیگ (ن) کے رہنماء کیپٹن (ر)صفدر نے کہا کہ جلد قائد مسلم لیگ (ن) خیبرپختونخوا سے سیاسی مہم کا آغاز کرنیوالے ہیں، وہ سوات اور دیگر علاقوں کا دورہ کرینگے۔تقریب سے خطاب کرتے ہوئے کیپٹن صفدر نے کہا کہ کہ ملک ترقی کر رہا ہے، یہ پانچ سال ملے تو اگلے پانچ سال ضرور ملیں گے۔

(جاری ہے)

انہوں نے کہا کہ مریم نواز کو کہتا ہوں وہ ایک ہفتہ اس صوبے کو بھی دیں، اگر وہ نہیں آتیں تو خیبرپختونخوا کے وزیر اعلی کو تھوڑی تربیت دیں۔

انہوں نے کہا کہ خیبرپختونخوا کا انتہائی برا حال ہوگیا ہے، خیبرپختونخوا کا حال تورا بورا سے زیادہ مختلف نہیں ہے۔انہوں نے کہا کہ باقی صوبوں کے مقابلے میں خیبرپختونخوا بہت پیچھے رہ گیا ہے، ہم خیبرپختونخوا کو آگے لے جانا چاہتے ہیں۔ انہوں نے کہا کہ پنجاب اور وفاق ترقی کر رہا ہے، ڈالر اور پٹرول کی قیمتیں رک گئی ہیں، خیبرپختونخوا حکومت کا ایک ہی کام ہے، گاڑیاں بھرو اور ڈی چوک چلو۔