فرق جان لیں! ایک کھیل ہوتا ہے اور ایک کھلواڑ، وطن سے کھلواڑ کرنے والے دوست نہیں ہوتے

لاہور ( اردوپوائنٹ اخبار تازہ ترین۔ آئی پی اے ۔ 30 جنوری 2025ء ) وزیراعلیٰ پنجاب مریم نوازشریف نے کھیلتا پنجاب گیمز 2025 کے ڈویژنل مقابلے جیتنے والے 2200 کھلاڑیوں کیلئے مفت ای بائیکس کا اعلان کیا ہے۔ وزیر اعلیٰ مریم نواز شریف نے کھیلتا پنجاب گیمز 2025 ء کی افتتاحی تقریب سے خطاب کرتے ہوئے کہا کہ ونرپلیئرز کیلئے ہارس اینڈ کیٹل شو میں فری انٹری دینے کی ہدایت کی ہے اورکہا کہ سپورٹس کیلئے 2 کی بجائے 5ارب روپے بھی چاہیے تو دیں گے۔

پنجاب کے کھلاڑیوں کو انٹرنیشنل سطح پر فاتح دیکھنا چاہتی ہوں۔ تعلیم کے بعد سب سے زیادہ توجہ نوجوانوں کیلئے سپورٹس پر ہے۔ ملک کا جھنڈا اب نوجوانوں کے ہاتھ میں ہے، نوجوان جھنڈا نہیں گرنے دیں گے۔وزیراعلیٰ مریم نوازشریف نے کہا کہ پنجاب کا سارا بجٹ اپنے بچوں کیلئے حاضر ہے۔

(جاری ہے)

انٹرنیشنل سپورٹس مقابلوں میں نوجوانوں کو گولڈ میڈلسٹ دیکھنا چاہتی ہوں۔

نوجوانوں کی تعلیم، سپورٹس، روزگار میری ذمہ داری ہے، پڑھو، لکھو، آگے بڑھو اور ترقی کرو۔ نوجوان پلیئر ز سب میرے چیمپئن ہیں، سب کو شاباش دیتی ہوں۔ کھیلتا پنجاب، ترقی کرتا پنجاب، میں یہی دیکھنا چاہتی ہوں، مریم نوازشریف نے کہا کہ نوجوان لوگ بہت سے مشکلات عبور اور محنت کرکے یہاں تک پہنچے ہو، آپکو شاباش دیتی ہوں۔ پنجاب میں ٹیلنٹ کی کوئی کمی نہیں، بس ساز گار ماحول درکار جو دے رہے ہیں - کھیل کے میدان کئی سال سے ویران تھے،آباد کیا تو یہاں کھلاڑیوں کی قطاریں لگ گئیں - ترقی کا یہ سفر یہاں نہیں رکے گا، پنجاب کے ہر میدان کو آباد کیا جائیگا، کھیلتا پنجاب پاکستان کی تاریخ کا سب سے بڑا سپورٹس ایونٹ ہے، فیصل ایوب کھوکھر اچھا کام کر رہے - مریم نوازشریف نے کہا کہ وزیر کھیل کی ذمہ داری لگائی کہ پنجاب میں بچوں کو پڑھتا دیکھنے کے ساتھ کھیلتا دیکھنا چاہتی ہوں - ارشد ندیم، اعصام الحق اور نوح بٹ نوجوانوں کیلئے مثال ہیں - کل ارشد ندیم دیگر کی جگہ آپ یہاں کھڑے ہونگے -جیت کر آنے والی پنجاب کی بیٹیوں کو دیکھ کر بہت خوش ہوں۔

چیمپئن بچوں نے ملک کا جھنڈایونہی ہمیشہ بلند رکھنا ہے- مقابلے میں ہر کھیل سے بہترین کھلاڑی سامنے آرہے ہیں - میں وزیر کھیل، سیکرٹری اور ڈی جی کوشاباش دیتی ہوں - 2 ارب کی بجائے 5 ارب کا بھی بجٹ چاہیے ہے تو کھیلوں پر لگاؤں گی-وزیراعلیٰ مریم نوازشریف نے کہا کہ تمام کھلاڑی100 فیصدمیرٹ پر آگے پہنچے ہیں، ایک بھی سفارش پر نہیں آیا- ہونہار سکالرشپ کے تحت پورے پنجاب میں نوجوانوں سے ملی تب معلوم ہوا کتنا ٹیلنٹ ہے۔

آپ لوگوں کی فلاح وبہبود اللہ تعالیٰ کے بعد مریم نواز شریف کی ذمہ داری ہے- پنجاب کے نوجوان میری پہلی ترجیح ہیں، تمام ممکنہ وسائل فراہم کرونگی۔ انہوں نے کہا کہ نوجوانوں کیلیے آسان قرضوں سکیم لارہے ہیں تاکہ میرے بچے در در نہ بھٹکیں، کاروبار کریں -نوکری نہ کرنیوالے نوجوانوں کو کاروبار کیلئے 10 لاکھ سے 3 کروڑ تک قرضے دیے جائیں گے- فروری میں ہارس اینڈ کیٹل شو دوبارہ شروع کرنے جا رہے ہیں، کھیلنا بچوں کا جبکہ کھیل کو پروموٹ اور وسائل مہیا کرنا حکومت کا فرض ہے - وزیراعلیٰ مریم نوازشریف نے خطاب کرتے ہوئے کہا کہ ایک کھیل ہوتا ہے ایک کھلواڑ ہوتا ہے، فرق جان لیں - چیمپئن نے کھیلنا ہے ملک سے کھلواڑ کرنیوالوں کی باتوں میں نہیں آنا، کوئی آپ سے کہے کے اپنی دھرتی ماں سے کھلواڑ کرو تو اسے نہ میں جواب دینا ہے۔

کوئی آپ کو کہے کے رینجرز کو مارو، پولیس کو مارو میٹرو بس کو جلا دو، پٹرول بم چلاو تو انہیں انکار کرو-جو آپ کو کہے کہ پڑھو، لکھو، ترقی کرو، کھیلووہ آپ کا دوست ہے کھلواڑ کرانیوالے دوست نہیں - جو آپ کو کہے کہ ملک کو آگ لگا دو، اداروں پر حملہ کرو وہ آپ کا دشمن ہے۔ صرف پاکستان سب کی ریڈ لائن ہونی چاہیے۔ اس کیخلاف کوئی قدم نہیں اٹھنا چاہیے، نوجوانوں کا اٹھنے والا ہر قدم پاکستان کی ترقی کے لئے ہونا چاہیے-وزیراعلیٰ مریم نوازشریف نے کہا کہ کھیلے گا پنجاب، پڑھے گا پنجاب اور آگے بڑھے گا پنجاب۔