بھارتی فوجیوں کی مختلف اضلاع میں محاصرے اورتلاشی کی کارروائیاں

سرینگر (اُردو پوائنٹ اخبارتازہ ترین - اے پی پی۔ 11 فروری2025ء) کنٹرول لائن کے دونوں اطراف ، پاکستان اور دنیا بھر میں مقیم کشمیریوں نے ممتاز کشمیری رہنما محمد مقبول بٹ کو آج ان کے 41ویں یوم شہادت پر شاندار خراج عقیدت پیش کیا۔کشمیر میڈیا سروس کے مطابق بھارتی حکومت نے محمد مقبول بٹ کو حق خودارادیت کے حصول کے لئے کشمیریوں کی جدوجہد میں اہم کردار ادا کرنے پر 1984میں آج ہی کے دن نئی دلی کی تہاڑ جیل میںپھانسی دی تھی اور ان کی میت کو جیل کے احاطے میں ہی سپرد خاک کر دیا تھا۔

کل جماعتی حریت کانفرنس کے ترجمان ایڈووکیٹ عبدالرشید منہاس نے سرینگر میں جاری ایک بیان میں کہا کہ مقبول بٹ کشمیر یوں کی جدوجہد آزادی کی علامت ہیں ۔انہوں نے کشمیریوں کے ناقابل تنسیخ حق خود ارادیت کے حصول تک مقبول بٹ کے مشن کو جاری رکھنے کے عزم کااعادہ کیا۔

(جاری ہے)

غیر قانونی طورپر نظربندکل جماعتی حریت کانفرنس کے رہنما مولوی بشیر عرفانی نے جیل سے جاری ایک پیغام میں مقبول بٹ کی میت کشمیریوں کے حوالے کرنے کامطالبہ کیا۔

محمد مقبول بٹ کے یوم شہادت کے سلسلے میں مظفرآباد میں ایک ریلی نکالی گئی۔ریلی کے شرکا ء نے تنازعہ کشمیر کے حل میں مزید تاخیر کے سنگین نتائج کے بارے میں خبردار کیا۔ جموں و کشمیر ڈیموکریٹک فریڈم پارٹی کے زیر اہتمام ریلی میں غیر قانونی طورپرنظر بند حریت رہنمائوں کی فوری رہائی کا مطالبہ کیا گیا۔ ایک کروڑ کشمیر ای میلز مہم کے سلسلے میں اسلام آباد میں منعقدہ ایک تقریب کے مقررین نے عالمی برادری پرزوردیاکہ وہ کشمیر کے حوالے سے اقوام متحدہ کی ذمہ داریاں پوری نہ کرنے پر بھارت کو جوابدہ ٹھہرائے۔

مقبول بٹ کے یوم شہادت پرکشمیر کونسل یورپ کے زیر اہتمام برسلز میں ایک کانفرنس منعقد کی گئی ۔ادھر بھارتی فوجیوں نے پلوامہ، کپواڑہ، راجوری، پونچھ، ڈوڈہ اور کشتواڑ اضلاع میں محاصرے اور تلاشی کی کارروائیاں تیز کر دی ہیں جس سے مقامی لوگوں میں شدید خوف و ہراس پھیل گیا۔ضلع راجوری کے علاقے نوشہرہ میں ایک بھارتی فوجی گولی لگنے سے شدید زخمی ہوگیا۔

بھارتی وزیراعظم نریندر مودی کے دورہ فرانس کے خلاف پیرس میں پاکستانیوں اور کشمیریوں نے احتجاجی مظاہرہ کیا۔ احتجاج کا اہتمام جموں و کشمیر ڈیموکریٹک فورم فرانس نے کیا تھا۔ ہاتھوں میں پلے کارڈز اٹھائے مظاہرین نے مقبوضہ جموں و کشمیر میں بھارتی مظالم کی مذمت کی۔ شرکاء نے مودی کو مسلمانوں کا قاتل قرار دیتے ہوئے بھارت کے خلاف نعرے لگائے۔ مظاہرین نے مظلوم کشمیریوں سے اظہار یکجہتی کیا۔جیل میں نظر بند کشمیری رکن پارلیمنٹ انجینئر رشید نے بھارتی پارلیمنٹ سے خطاب کرتے ہوئے بارہمولہ اور کٹھوعہ میں حالیہ شہری ہلاکتوں کا مسئلہ اٹھایا۔ انہوں نے مقبوضہ علاقے میں بھارتی فورسزکے کردار پر سوال اٹھاتے ہوئے کہاکہ کشمیریوں کا خون سستا نہیں ہے۔