وزیراعظم شہباز شریف نے پی آئی اے کی نجکاری کیلئے اہم ہدایات دیدیں

نجکاری کمیشن کو جون تک پرائیوٹائز کرنے کا ٹاسک دیدیا، پی آئی اے کی نجکاری اکتوبر کی بجائے قبل ازوقت کی جائیگی

فیصل علوی ہفتہ 15 فروری 2025 15:04

وزیراعظم شہباز شریف نے پی آئی اے کی نجکاری کیلئے اہم ہدایات دیدیں

اسلام آباد(اردوپوائنٹ اخبار تازہ ترین۔15فروری 2025ء) وزیراعظم شہباز شریف نے قومی ائیر لائن (پی آئی اے )کی نجکاری کیلئے اہم ہدایات دیدیں، پی آئی اے کی نجکاری کے حوالے سے اہم پیش رفت،وزیراعظم نے پی آئی اے کو جون تک پرائیوٹائز کرنے کاٹاسک دیدیا، پی آئی اے کی نجکاری اکتوبر کی بجائے جون میں کرنے کی تیاریاں شروع کر دی گئیں،میڈیا رپورٹس کے مطابق پی آئی اے کی معاشی حالت کی بہتری کیلئے امریکا کے روٹس کھولنے کیلئے سکیورٹی آڈٹ اور امریکہ کی فیڈرل ایوی ایشن اتھارٹی کے ساتھ مشاورت شروع کرنے کا فیصلہ بھی کیا گیا ہے۔

یہ بھی بتایا گیا ہے کہ نجکاری کمیشن کو وزیر اعظم شہباز شریف کی طرف سے ملنے والی ہدایات کے مطابق پی آئی اے کی نجکاری قبل ازوقت کی جائیگی۔ ذرائع کا کہنا ہے کہ امریکی روٹس کھولنے کیلئے امریکی ماہرین کا وفد مارچ یا اپریل میں بلائے جانے کی تیاریاں کی جارہی ہیں۔

(جاری ہے)

یہ بھی بتایا گیا ہے کہ آئی ایم ایف کی جانب سے حکومت سے مطالبہ کیا ہے کہ قومی ائیر لائن (پی آئی اے )کی نجکاری جون سے قبل کی جائے۔

آئی ایم ایف کے مطالبے پر وزیراعظم شہبازشریف نے پی آئی اے کی نجکاری کے حوالے سے وزارت خزانہ، وزارت نجکاری اور پی آئی اے حکام کو ہدایات جاری کردی ہیں۔یاد رہے کہ قبل ازیں قومی ائیر لائن (پی آئی اے)کی برطانیہ کیلئے براہ راست پروازوں کے معاملے کا جائزہ لینے کیلئے برطانوی سیفٹی کمیٹی نے اجلاس 12مارچ کو طلب کیا تھا۔ برطانوی سیفٹی کمیٹی کی منظوری سے پاکستانی پروازوں پرجولائی2020 سے عائد پابندی ختم ہوجائیگی۔

میڈیا رپورٹس کے مطابق برطانوی سیفٹی کمیٹی کے اجلاس میں پی آئی اے کی پروازوں کی بحالی کا جائزہ لیا جائے گا۔برطانوی سول ایوی ایشن اور محکمہ ٹرانسپورٹ ڈی ایف ٹی کی ٹیم پی آئی اے اور پاکستان سول ایوی ایشن کے حالیہ آڈٹ کی رپورٹ اجلاس میں پیش کرے گی۔ برطانوی سیفٹی کمیٹی اجلاس میں پی آئی اے اورایئربلیو کی پروازوں کی بحالی کا جائزہ لے گی۔ برطانوی ایوی ایشن اورمحکمہ ٹرانسپورٹ نے پاکستان کے دورے کے دوران پی آئی اے اور سول ایوی ایشن کا آڈٹ مکمل کیا تھا۔