امیربالاج قتل کیس؛ طیفی بٹ پنجاب پولیس کے حوالے، مرکزی ملزم کو دبئی سے لاہور پہنچا دیا گیا

ملزم خواجہ تعریف گلشن کو دبئی کی عدالت میں پیش کیا گیا جہاں عدالت نے طیفی بٹ سے پاکستان جانے سے متعلق سوالات کیے

ساجد علی جمعہ 10 اکتوبر 2025 13:15

امیربالاج قتل کیس؛ طیفی بٹ پنجاب پولیس کے حوالے، مرکزی ملزم کو دبئی ..

لاہور ( اُردو پوائنٹ اخبارتازہ ترین۔ 10 اکتوبر 2025ء ) صوبہ پنجاب کے دارالحکومت لاہور میں ٹیپو ٹرکاں والا کے بیٹے امیربالاج قتل کیس کے مرکزی ملزم طیفی بٹ کو پنجاب پولیس کے حوالے کردیا گیا جس کے بعد پولیس نے ملزم کو دبئی سے لاہور پہنچا دیا۔ اطلاعات کے مطابق پنجاب پولیس امیر بالاج ٹیپو قتل کیس کے مرکزی ملزم طیفی بٹ کو دبئی سے پاکستان لے آئی ہے، اس مقصد کے لیے پہلے ملزم خواجہ تعریف گلشن عرف طیفی بٹ کو دبئی کی عدالت میں پیش کیا گیا جہاں عدالت نے طیفی بٹ سے پاکستان جانے سے متعلق سوالات کیے، اس پر ملزم نے پاکستان جانے اور مقدمات کا سامنا کرنے کا کہا تو ملزم کی رضا مندی پر دبئی کی عدالت نے طیفی بٹ کو پنجاب پولیس کے حوالے کردیا جس کے بعد کیس کے مرکزی ملزم کو لاہور منتقل کردیا گیا۔

(جاری ہے)

بتایا گیا ہے کہ امیر بالاج قتل کیس کے مرکزی ملزم خواجہ تعریف گلشن عرف طیفی بٹ کو انٹرپول کی مدد سے دبئی سے گرفتار کیا گیا، ملزم واردات کے بعد بیرون ملک فرار ہوگیا تھا، امیر بالاج ٹیپو قتل کیس میں مطلوب ملزم طیفی بٹ کو اشتہاری ملزم قرار دیا گیا تھا، مرکزی ملزم کی گرفتاری کے لیے پولیس نے گزشتہ سال وزارت داخلہ سے رابطہ کیا، وزارت داخلہ کی منظوری کے بعد طیفی بٹ کے ریڈ وارنٹ حاصل کیے گئے اور ملزم کی گرفتاری کیلئے انٹرپول سے رابطہ کیا گیا جس کے بعد پنجاب پولیس کی ٹیم نے ملزم کو انٹرپول کی مدد سے گرفتار کیا۔

بتاتے چلیں کہ امیر بالاج ٹیپو کو اس وقت قتل کیا گیا جب وہ لاہور کے علاقہ ٹھوکر نیاز بیگ کے قریب ایک نجی ہاؤسنگ سوسائٹی میں سابق ڈی ایس پی اکبر اقبال کے بیٹے کی شادی کی تقریب میں شریک تھا، تقریب کے دوران وہاں موجود ایک حملہ آور نے فائرنگ کی جس سے امیر بالاج ٹیپو سمیت 3 افراد زخمی ہوئے جنہیں فوری ہسپتال منتقل کیا گیا تاہم امیر بالاج زخموں کی تاب نہ لاتے ہوئے دم توڑ گیا۔