صنعت، زراعت آئی ٹی کی ترقی، روزگار کی فراہمی اور برآمدات میں اضافہ حکومت کی اولین ترجیحات میں شامل ہیں، وزیراعظم شہباز شریف کی اقتصادی مشاورتی کونسل کے اجلاس میں گفتگو

اسلام آباد (اُردو پوائنٹ اخبارتازہ ترین - اے پی پی۔ 19 فروری2025ء) وزیرِ اعظم شہباز شریف نے کہا ہے کہ صنعت، زراعت آئی ٹی کی ترقی، روزگار کی فراہمی اور برآمدات میں اضافہ حکومت کی اولین ترجیحات میں شامل ہیں، ملک میں گرین ڈیٹا سینٹرز کے قیام کیلئے کوشاں ہیں، ملک میں ٹیلی کمیونیکشن سروسز کی بہتری اور دور دراز علاقوں تک انٹرنیٹ کی رسائی سے آئی ٹی برآمدات اور فری لانسرز کی تعداد میں اضافے کیلئے کوشاں ہیں۔

بدھ کو وزیراعظم آفس کے پریس ونگ سے جاری بیان کے مطابق وزیراعظم محمد شہباز شریف کی زیر صدارت اقتصادی مشاورتی کونسل کا اجلاس منعقد ہوا۔اجلاس میں کونسل ارکان نے حکومتی پالیسیوں پر مکمل اعتماد کا اظہار کیا اور مستقبل کیلئے تجاویز بھی دیں ۔ وزیراعظم نے کونسل ارکان کی اجلاس میں شرکت پر شکریہ ادا کیا اور ان کی تجاویز کا خیر مقدم کیا۔

(جاری ہے)

اس موقع پر گفتگو کرتے ہوئے وزیراعظم محمد شہباز شریف نے کہا کہ معاشی استحکام فرد واحد نہیں بلکہ پوری ٹیم کی کاوشوں کی بدولت ممکن ہوا، معیشت کی پائیدار ترقی کے حوالے سے مزید محنت کیلئے پر عزم ہیں، خطے میں تجارت کے فروغ کی موجودہ استعداد سے بھرپور فائدہ اٹھائیں گے۔ انہوں نے کہا کہ مقامی صنعت کو اس قابل بنائیں گے کہ ہماری برآمدات بین الاقوامی مارکیٹ میں مقابلہ کر سکیں، صنعت، زراعت آئی ٹی کی ترقی، روزگار کی فراہمی اور برآمدات میں اضافہ حکومت کی اولین ترجیحات میں شامل ہیں۔

وزیراعظم نے کہا کہ ملک میں گرین ڈیٹا سینٹرز کے قیام کیلئے کوشاں ہیں، ملک میں ٹیلی کمیونیکشن سروسز کی بہتری اور دوردراز علاقوں تک انٹرنیٹ کی رسائی سے آئی ٹی برآمدات اور فری لانسرز کی تعداد میں اضافے کیلئے کوشاں ہیں۔ انہوں نے کہا کہ ڈیجیٹل کرنسی کو ریگولیٹ کرنے کے حوالے سے بھی مشاورت جاری ہے، آج کی تعمیری گفتگو کو قابل عمل منصوبے میں تبدیل کرنا ہے۔

شرکا نے اس بات کا اعتراف کیا کہ پاکستان کی معیشت مستحکم اور ترقی کی جانب گامزن ہے، قیمتوں میں استحکام سے پیداوار میں اضافہ ہو رہا ہے، حکومتی معاشی ٹیم نے تمام اندازوں اور تجزیوں کو غلط ثابت کیا، پہلی مرتبہ ہے کہ عالمی معاشی ادارے، کاروباری برادری اور سرمایہ کار حکومتی ایکشن پلان کے یک زبان ہو کر معترف ہیں۔ شرکا نے کہا کہ حکومت ملکی تاریخ میں پہلی مرتبہ ادارہ جاتی اصلاحات پر سنجیدگی سے عملدرآمد یقینی بنا رہی ہے، ملک کے وزیراعظم کی کاروباری برادری اور تمام سٹیک ہولڈرز سے باقاعدگی سے مشاورت پر ان کو خراج تحسین پیش کرتے ہیں۔

انہوں نے مزید کہا کہ ملک کے تمام بڑے شعبوں میں ترقی حکومت کے ٹیکس نظام کی بہتری، ضابطوں میں آسانی اور کاروبار و سرمایہ کار دوست ماحول کی فراہمی کے اقدامات سے ممکن ہوئی، تاریخ میں پہلی مرتبہ ہے کہ حکومتی معاشی ٹیم تک کاروباری برادری کی رسائی آسان اور باقاعدگی سے مشاورت ہو رہی ہے، ملکی صنعت کا پہیہ چل پڑا ہے، برآمدات میں ایک ماہ میں خاطر خواہ اضافہ اس کا سب سے بڑا ثبوت ہے، سمگلنگ کی روک تھام سے برآمدات میں اضافہ ہوا جو خوش آئند امر ہے۔

اجلاس میں شرکا نے وزیراعظم کو مختلف شعبوں کے حوالے سے تجاویز پیش کیں۔ وزیرِاعظم نے متعلقہ حکام کو کونسل ممبران سے مل کر تجاویز کے حوالے سے ایک جامع لائحہ عمل تشکیل دینے کی ہدایت کی۔اجلاس میں جہانگیر خان ترین، ثاقب شیرازی، شہزاد سلیم، مصدق ذوالقرنین، ڈاکٹر اعجاز نبی، آصف پیر، زید بشیر اور سلمان احمد کے ساتھ ساتھ وفاقی وزرا احسن اقبال، رانا تنویر حسین ،جام کمال خان، احد خان چیمہ، محمد اورنگزیب، وزیرِ مملکت علی پرویز ملک، وزیر اعظم کے کوآرڈینیٹر رانا احسان افضل اور متعلقہ اعلیٰ حکام نے شرکت کی۔\932