ایک پارٹی کو پنجاب حکومت کی کارکردگی سے بہت مسئلہ ہورہا ہے، عظمیٰ بخاری

لاہور(اردوپوائنٹ اخبار تازہ ترین۔28فروری 2025)پنجاب کی وزیر اطلاعات عظمیٰ بخاری کا کہنا ہے کہ ایک پارٹی کو پنجاب حکومت کی کارکردگی سے بہت مسئلہ ہورہا ہے،پی ٹی آئی کی طرف سے پنجاب حکومت کیخلاف پروپیگنڈا کیا جارہا ہے، پنجاب حکومت کی کارکردگی کچھ لوگوں کو ہضم نہیں ہو رہی،لاہور میں پریس کانفرنس کرتے ہوئے انہوں نے کہا کہ تحریک انصاف والوں کو مریم نواز کی کارکردگی سے آج بہت تکلیف ہورہی ہے۔

وزیراعلیٰ پنجاب مریم نواز نے ایک سال میں 90 سے زائد منصوبے شروع کئے۔ کسان کارڈ، ایئرایمبولنس اور دھی رانی جیسے پروگرامز عوام کی ضرورت ہیں۔ مریم نواز نے ایک سال میں 100 گھروں کی چابیاں لوگوں کو دیں۔اسی طرح 10 ہزار گھر تکمیل کے آخری مرحلے میں ہیں۔ مریم نواز نے اپنی کارکردگی سے عوام کے دلوں میں جگہ بنائی ہے ۔

(جاری ہے)

ان کا کہنا تھا کہ پنجاب حکومت کو ایک سال مکمل ہوا، وزیراعلیٰ مریم نواز کی حکومت کا ایک بھی منصوبہ ادھورا نہیں ہے۔

کوئی بھی منصوبہ ایسا نہیں کہ کہا جارہا ہو شرو ع کریں گے۔ ہر منصوبے کا بتانے کیلئے دروازے پر دستک نہیں دی جاتی۔ پاکستان تحریک انصاف والے اپنے دور حکومت میں مریم نواز کو والد کے سامنے گرفتار کرنے میں مصروف تھے۔پنکی اور گوگی کا رشوت کا بازار گرم تھا، ان کے دور میں ہرعہدے کا ایک ریٹ مقرر تھا۔پی ٹی آئی کے کسی اشتہار پر کوئی بڑا منصوبہ نظر نہیں آئے گا۔

انہوں نے اپنے دور میں تبدیلی کا پروگرام، 50 ہزار گھر،لاکھوں نوکریوں والا اشتہار چھاپا تھا۔ عثمان بزدار نے اپنے دور میں کچھ کرکے نہیں دکھایا۔ ان نالائقوں کے پاس فرصت نہیں تھی یہ مصروف تھے۔عثمان بزدار کو اپنا تعارف کرانے کیلئے شہبازشریف کے نام کی ضرورت پڑتی تھی۔پریس کانفرنس سے خطاب کرتے ہوئے عظمیٰ بخاری کا مزید کہنا تھا کہ تحریک انصاف کا دور حکومت سکینڈلز سے بھرا رہا۔

پی ٹی آئی کے دور میں پیسے لیکر تقررو تبادلے کئے جاتے تھے۔ پی ٹی آئی کے منصوبوں کا کوئی ریکارڈ نہیں ہے۔ یہ منصوبے صرف سوشل میڈیا پر تھے۔بانی پی ٹی آئی ان کیلئے مہاتما تھے۔ مہاتما نے خود کہا عثمان بزدار اپنی کارکردگی اشتہارات کے ذریعے بتائیں۔پی ٹی آئی والوں نے انہوں نے 2 دن سے ایک مہم شروع کی ہوئی ہے۔ یہ کہہ رہے ہیں منصوبے پی ٹی آئی کے اورتختی مریم نواز کی ہے۔

ڈائیلسز کا پروگرام بزدار کا نہیں شہبازشریف نے شروع کیا تھا۔ وزیراعلیٰ مریم نواز نے ڈائیلسز کارڈ کیلئے 10 لاکھ روپے مختص کردیئے ہیں۔انہوں نے کہا کہ گرین بسیں وزیراعلیٰ مریم نوازاپنی حکومت کے پہلے 10 ماہ میں لائیں۔ لاہور کی سڑکوں پر 27 گرین بسیں دوڑ رہی ہیں۔آئندہ چند ماہ میں 500گرین بسیں مختلف شہروں کیلئے اور آجائیں گی۔ پنجاب کے اندر 700 نئی سڑکیں بن رہی ہیں۔

وزیراعلیٰ مریم نوازنے صوبے میں سٹیٹ آف دی آرٹ بی ایچ یوز بنائے ہیں۔پی ٹی آئی کو مریم نواز کی کارکردگی سے آج بہت تکلیف ہورہی ہے۔ سپیڈو بس پر بھی سوشل میڈیا پر منفی مہم چلائی جارہی ہے۔ ان کو سپیڈو بس سروس اپنے نام سے منسوب کرنے پر شرم نہیں آتی۔ آپ نے کبھی پی ٹی آئی کے لوگوں سے اچھا فیڈ بیک نہیں لیا۔انہوں نے مزید کہا کہ ایئرایمبولینس کے نعرے بھی بہت بار لگے۔ ایئرایمبولینس کے نعرے پرویزالٰہی اورعثمان بزدار نے بھی لگائے۔ ایئرایمبولینس وزیراعلیٰ مریم نواز حکومت کے پہلے 6ماہ میں لائیں۔ یہ کسان کارڈ پر بھی بات کرتے ہیں، تحقیقات کے بعد پتہ چلا ان کے کسی منصوبے کی کوئی ڈیٹیل موجود نہیں۔آج کسان کارڈ پر ساڑھے 7لاکھ سے زیادہ لوگ اربوں روپے کی خریداری کرچکے ہیں۔