امریکی سفری پابندیوں کیلئے 43 ممالک کی فہرست تیار، پاکستان اورنج لسٹ میں شامل

10 ممالک کو اورنج لسٹ میں شامل کرنے کا کہا گیا ہے، ان ممالک کے شہریوں کے امیگرنٹ اور سیاحتی ویزے محدود کیے جائیں گے

ساجد علی ہفتہ 15 مارچ 2025 11:46

امریکی سفری پابندیوں کیلئے 43 ممالک کی فہرست تیار، پاکستان اورنج لسٹ ..

واشنگٹن ( اُردو پوائنٹ اخبارتازہ ترین۔ 15 مارچ 2025ء ) امریکہ کے صدر ڈونلڈ ٹرمپ کی انتظامیہ نے 43 ممالک کے شہریوں پر امریکی سفری پابندیوں کی تجاویز دے دیں۔ امریکی اخبار کے مطابق ٹرمپ انتظامیہ کی نئی سفری پابندیوں کی فہرست میں 10 ممالک کو اورنج لسٹ میں شامل کرنے کی تجویز ہے، اورنج لسٹ میں پاکستان بیلاروس، ہیٹی، میانمار، روس اور ترکمانستان شامل ہیں، اس لسٹ میں شامل ممالک کے شہریوں کے امیگرنٹ اور سیاحتی ویزے محدود کیے جائیں گے، اورنج لسٹ میں شامل ممالک کے کاروباری مسافروں کو کچھ شرائط کے ساتھ امریکا میں داخلے کی اجازت دی جاسکتی ہے۔

بتایا گیا ہے کہ یلو لسٹ میں 22 ممالک کو شامل کرنے کی تجویز ہے، اس یلو لسٹ میں شامل ممالک کے شہریوں کو تحفظات دور کرنے کے لیے 60 دن کا وقت دیا جائے گا جب کہ 11 ممالک کو ریڈ لسٹ میں شامل کیا گیا ہے، جن میں افغانستان، بھوٹان، کیوبا،ایران، لیبیا اور شمالی کوریا ایسے ممالک ہیں جو ریڈ لسٹ میں شامل ہے، صومالیہ، سوڈان، شام وینزویلا اور یمن کو بھی ریڈ لسٹ میں رکھا گیا ہے، ریڈ لسٹ میں شامل ممالک کےشہری امریکہ کا سفرنہیں کرسکیں گے۔

(جاری ہے)

بتایا جا رہاہے کہ امریکہ داخلے پر شہریوں کی پابندی کی وضاحت کیلئے پاکستان نے امریکی اسٹیٹ ڈپارٹمنٹ سے رابطہ کیا ہے، پاکستان نے امریکہ میں اپنے شہریوں کے داخل ہونے پر عائد ہونے والی ممکنہ سفری پابندیوں کی اطلاعات کے بعد وضاحت کے لیے امریکہ کے محکمہ خارجہ سے رابطہ کیا، اس کی تصدیق امریکہ میں پاکستان کے سفیر رضوان سعید شیخ نے کی۔ اس حوالے سے ان کا کہنا ہے کہ سفری پابندیوں سے متعلق وضاحت کیلئے ہم امریکی محکمہ خارجہ کے ساتھ رابطے میں ہیں تاہم ان کی جانب سے اب تک ایسی کوئی معلومات شیئر نہیں کی گئیں، اس متعلق تمام باتیں فی الحال خبروں پر مبنی ہے، اب تک کچھ بھی سرکاری طور پر سامنے نہیں آیا، ہم اب بھی تصدیق کا انتظار کر رہے ہیں۔