حکومت نہ تو خود افغانستان کو انگیج کرتی ہے نہ کسی اور کو کرنے دیتی ہے، ہمیں بات کرنے دے، یقین ہے دہشتگردی کی لہر میں کمی آئے گی، مشیراطلاعات خیبرپختونخواہ

اتوار 23 مارچ 2025 11:00

پشاور(اُردو پوائنٹ اخبارتازہ ترین - این این آئی۔ 23 مارچ2025ء)ترجمان خیبر پختونخوا حکومت بیرسٹر محمد علی سیف کا کہنا ہے کہ اگر وفاقی حکومت کے بقول دہشت گردی کے تانے بانے افغانستان سے ملتے ہیں تو حکومت کو افغانستان سے بات کرنے میں کیا رکاوٹ ہی ایک انٹرویو میں بیرسٹر سیف کا کہنا تھا حکومت نہ تو خود افغانستان کو انگیج کرتی ہے، نہ کسی اور کو بات کرنے دیتی ہے، وفاق کو چاہیے کہ خیبر پختونخوا حکومت کو افغانستان سے بات کرنے دے کیونکہ ہمارے لوگ نشانہ بن رہے ہیں، یقین ہے کہ افغانستان سے بات کرنے کے نتیجے میں دہشت گردی کی لہر میں کمی آئے گی۔

ان کا کہنا تھا پاکستان کے خلاف سرگرم تمام تنظیموں کے ساتھ بات چیت ضروری ہے، آخر اس مسئلہ کا انجام کیا ہے کیا مزید لڑنا ہے یا مسئلہ ختم کرنا ہے، افغانستان سے بات کریں اور ان سے کہیں کہ ٹی ٹی پی کو کنٹرول کریں۔

(جاری ہے)

مشیر اطلاعات کے پی کا کہنا تھا 2021میں افغانستان سے امریکی افواج کا انخلا ہوا، طے ہوا تھا کہ افغان طالبان پاکستان کے ساتھ مسائل پر بات کریں گے، اپریل 2022 میں پی ڈی ایم کی حکومت آئی تب بھی یہ معاملہ چلتا رہا، بعد میں افغانستان سے تعلقات خراب ہونے پر یہ معاملہ رک گیا، حکومت کی نااہلی ہے کہ اب تک جنگ چل رہی ہے ورنہ یہ مسئلہ حل ہو سکتا ہے۔

بیرسٹر سیف کا کہنا تھا دہشتگردی کی آگ ہماری سرزمین پر لگی ہوئی ہے جسے علی امین گنڈا پور بجھانے کی کوشش کر رہے ہیں، دہشتگردی کی جنگ ختم کرنے کی ذمہ داری وفاقی حکومت کی ہے، طلال چوہدری کا احمقانہ بیان سنا ہے، علی امین گنڈاپور نے ایسی بات نہیں کی۔ان کا کہنا تھا شہباز شریف نے جلسوں میں دہشت گردوں سے کہا تھا ہماری طرف نہ آؤ باقی جو کرنا ہے کرو، مذاکرات کے دروازیکھولنے سے مسئلے کا حل نکل آتا ہے، بارڈر کو مینج رکھنا دوسرے ممالک سے بات وفاقی حکومت کا کام ہے، طلال چوہدری کو کہوں گا کہ وہ تنظیم سازی پر توجہ دیں۔