وزیر ریلوے کا کوئٹہ سے ملک بھر کیلئے ٹرین سروس کل سے بحال کرنے کا اعلان

 کوئٹہ(اردوپوائنٹ اخبار تازہ ترین۔26 مارچ 2025)وفاقی وزیر ریلوے حنیف عباسی نے کوئٹہ سے ملک بھر کیلئے ٹرین سروس بحال کرنے کا اعلان کر دیا،جعفر ایکسپریس کل پشاور سے کوئٹہ اور جمعہ کو کوئٹہ سے پشاور روانہ ہوگی،کوئٹہ سے ایک اسپیشل عید ٹرین بھی چلے گی،بولان میل ہفتے میں دو دن کے بجائے 7 دن ٹرین چلے گی،کوئٹہ میں پریس کانفرنس کرتے ہوئے وفاقی وزیر ریلو ے نے کہا کہ عید کے پہلے تین دنوں کیلئے 20 فیصد رعایت رکھی گئی ہے۔

آپ نے کبھی سنا کہ راولپنڈی میں کوئی بلوچ مارا گیا ہو۔ پوری بلوچ قوم نہیں چند لوگ ہیں جو پنچابی کے خلاف ہیں۔سانحہ جعفر ایکسپریس پر بہت افسوس ہے۔قیمتی جانوں کے ضیاع پر افسوس ہے۔ دہشت گردوں نے زبان قوم اور فرقوں کی بنیاد پر حملہ کیا تمام دنیا نے سانحہ جعفر ایکسپریس کی مذمت کی۔

(جاری ہے)

انہوں نے کہا کہ جعفرایکسپریس میں مقامی سطح پر سہولت کاری ہوئی۔

ملک بھر میں جاری دہشت گردی پاکستان کے خلاف منصوبہ سازی ہے۔ ہمارے لوگ دہشت گردوں کو معاونت فراہم کرتے ہیں اس لئے وہ کامیاب ہوتے ہیں۔جعفر ایکسپریس حملے کے دہشت گردوں کو بیرون ملک پیچھا کرکے بھی ماریں گے۔سیکورٹی اور حکومتی دونوں سطحوں پر فیصلہ ہوچکا کہ دہشت گرد جہاں ہوں گے ان کا پیچھا کیا جائے گا۔ پریس کانفرنس کے دوران وزیر ریلوے حنیف عباسی نے مزید کہا کہ جعفر ایکسپریس ٹرین حملے میں ملوث بہت سے دہشتگرد مارے گئے ہیں۔

ہم صوبائیت اور قومیت کے نعروں کی مذمت کرتے ہیں۔ دشمن کے عزائم اور کوشش کامیاب نہیں ہونے دینگے۔ سانحہ جعفر ایکسپریس میں معصوم بچے، عورتوں، جوان اوربزرگوں کو شانہ بنایا گیا۔ سیکیورٹی فورسز نے مہارت سے مسافروں کی جان بچائی۔ملک کی بہادر سیکیورٹی فورسز کو خراج تحسین پیش کرتے ہیں۔ان کا یہ بھی کہنا تھا کہ ٹرین پر حملے کے بعد سیکورٹی فورسز کا ردعمل قابل اطمینان تھا۔

ضرار کمپنی کے کمانڈوز نے جانیں خطرے میں ڈال کر لوگوں کی جانیں بچائیں۔ان کا کہنا تھا کہ ہم دشمن کے عزائم اور کوشش کامیاب نہیں ہونے دینگے۔جعفر ایکسپریس حملے کے دہشت گردوں کو بیرون ملک پیچھا کر کے بھی ماریں گے۔قبل ازیںکوئٹہ پہنچنے پر وفاقی وزیر ریلوے حنیف عباسی نے کوئٹہ ریلوے سٹیشن کا دورہ کیاجہاں انہو ں نے حملے سے متاثرہ جعفر ایکسپریس کی بوگیوں کا معائنہ کیا۔

چیئرمین مظہر علی شاہ اور سی ای او ریلوے امیر بلوچ بھی وفاقی وزیر ریلوے حنیف عباسی کے ہمراہ کوئٹہ ریلوے سٹیشن پہنچے۔وفاقی وزیر ریلوے کو ڈی ایس ریلوے کی جانب سے ٹرین سروس کی بحالی سے متعلق بریفنگ دی گئی۔خیال رہے کہ 11مارچ کو کوئٹہ سے پشاور جانے والی جعفر ایکسپریس پر حملے کے بعد ریل گاڑیوں کی آمدورفت کا سلسلہ گذشتہ 15 روز سے معطل ہے۔کوئٹہ سے اندرون ملک کیلئے ٹرین سروس 15 ویں روز بھی معطل رہی۔راستوں کی بندش اور غیر محفوظ سفرکے باعث کوئٹہ کے شہری اذیت کا شکا ر ہیں۔