کابینہ اجلاس، خیبرپختونخوا کے اضلاع ایبٹ آباد میں گلیز، چترال میں گرم چشمہ بائیوسفیئر قرار

پشاور (اُردو پوائنٹ اخبارتازہ ترین - اے پی پی۔ 27 مارچ2025ء) خیبرپختونخوا کابینہ کا 29واں اجلاس وزیر اعلیٰ خیبر پختونخوا علی امین گنڈاپور کی زیر صدارت منعقد ہوا، جس میں خیبرپختونخوا کے اضلاع ایبٹ آباد میں گلیز، چترال میں گرم چشمہ بائیوسفیئر قرار دیدیئے گئے، جس کا اعلامیہ جاری کر دیا گیا۔ ان دو مقامات کے نوٹیفکیشن کی منظوری سے پاکستان میں بائیوسفیئر مقامات کی تعداد چار ہوگئی، جبکہ دنیا میں مجموعی طور پر 758 مقامات بائیوسفیئر قرار دیئے گئے ہیں۔

اجلاس میں کابینہ اراکین، چیف سیکرٹری، ایڈیشنل چیف سیکرٹریز، سینئر ممبر بورڈ آف ریونیو، انتظامی سیکرٹریز و ایڈووکیٹ جنرل نے شرکت کی، جبکہ اجلاس میں کئے گئے اہم فیصلوں میں سرفہرست ایبٹ آباد میں گلیز جبکہ چترال میں گرم چشمہ بائیوسفیئر قرار دینا ہے، اجلاس میں صوبائی کابینہ نے ان مقامات کے حوالے سے گزٹ نوٹیفکیشن کی منظوری دیدی ان دو مقامات کے نوٹیفکیشن کی منظوری سے پاکستان میں بائیو سفیئر مقامات کی تعداد چار ہوگئی ہے، دنیا میں مجموعی طور پر 758 مقامات بائیو سفیئر قرار دئے گئے ہیں، یونیسکو خیبر پختونخوا کے ان دو مقامات کو بائیو سفیئر نیٹ ورک میں شامل کرچکا ہے، اس سے پہلے پنجاب اور بلوچستان میں ایک ایک مقام اس نیٹ ورک میں شامل ہیں۔

(جاری ہے)

وزیراعلی خیبرپختونخوا نے اس پیشرفت کو اہم قرار دیتے ہوئے ایسے مقامات کے تحفظ کے لئے جامع حکمت عملی ترتیب دینے کی ہدایت کی، اس کے علاوہ کابینہ اجلاس میں مالی سال 2024/25 کے ترقیاتی پروگرام کے حجم کو بڑھاتے ہوئے 33 بلین اے ڈی پی پلس کی منظوری دیدی گئی۔ یہ منظوری اے ڈی پی منصوبوں میں فنڈ کے بہتر اخراجات کو دیکھتے ہوئے دی گئی ہےم جس کی شرح 80 فیصد سے زائد ہے وزیراعلی خیبرپختونخوا نے اس پیشرفت کو صوبے کے اہم منصوبوں کی بروقت تکمیل کے لئے اہم سٹریٹجی قرار دیا، احساس ہنر پروگرام کی مجموعی مالیت 3050 ملین کرنے اور نوجوانوں کو کاروبار کرنے کے لئے بلا سود قرضوں کی فراہمی کے لئے بینک آف خیبر کی خدمات حاصل کرنے کی منظوری بھی دی گئی۔

صوبائی کابینہ اجلاس میں خیبر پختونخوا مائنز اینڈ منرلز (امینڈمنٹ) ایکٹ 2025، نوٹریز رولز 1965 میں ساٹھ سال بعد اہم ترامیم سمیت آرٹسٹ ویلفیئر اینڈوومنٹ فنڈ کے لئے 50 ملین روپے فنڈ جاری کرنے کی منظوری بھی دی گئی ہے۔ اس موقع پر وزیراعلی نے فنڈ کو میرٹ کی بنیاد پر شفاف طریقے سے فراہمی کی ہدایت کی۔وزیراعلی نے ہدایت کی کہ یہ فنڈ کمزور مالی صورتحال کے دوران آرٹسٹس کی مالی امداد کے ساتھ آرٹسٹوں کو ان کے فن میں معاونت پر بھی استعمال کیا جائے، صوبے میں زلزلے سے متاثرہ علاقوں میں بحالی کے منتظر سکولوں کے لئے فنڈ کے اجراء کی بھی منظوری دی گئی ہے، فاٹا یونیورسٹی کے لئے 14.5 ملین روپے فنڈ کی فراہمی کی منظوری سمیت کہا گیا ہے کہ یہ فنڈ کیمپس میں واٹر سپلائی سکیم اور طلبہ کی ٹرانسپورٹ کے لئے بس کی خریداری میں استعمال ہوگا وزیراعلی نے امید ظاہر کی کہ فاٹا یونیورسٹی کے کیمپس کی تکمیل سے یونیورسٹی کی کارکردگی میں بہتری اور طلبہ کی تعداد میں اضافہ ہوگا، صوبائی سپورٹس گالا کے کھلاڑیوں کو انعامی رقم کی مد میں فنڈ جاری کرنے کی منظوری بھی دیدی گئی، انعامی رقم کا اعلان وزیراعلی خیبرپختونخوا نے کھلاڑیوں کی جانب سے بہترین کارکردگی پر ان کی حوصلہ افزائی کے لئے کیا تھا۔

پولو گیم کے حوالے سے وزیر اعلیٰ نے عندیہ دیا کہ شندور کے ساتھ پولو گیم پشاور میں بھی منعقد کرائے جائیں گے، پاپولیشن ویلفیئر ڈیپارٹمنٹ کے فیملی ویلفیئر اسسٹنٹس کے لئے ٹریول الاؤنس 250 روپے سے بڑھا کر 3000 روپے کرنے کی منظوری، سال 1995 کے بعد اس الاؤنس کو پہلی بار بڑھایا گیا ہے۔ وزیراعلی نے فیملی ویلفیئر اسسٹنٹس کے ماہانہ وزٹس کو مانیٹر کرنے اور کارکردگی کو جانچنے کی ہدایت کی۔محکمہ اطلاعات و تعلقاتِ عامہ کے مطابق اجلاس میں خیبرپختونخوا ہیلتھ فاؤنڈیشن کے بورڈ آف گورنرز کے ممبران و چیئرپرسن کی تقرری، اور صوبائی اسمبلی کی قرارداد نمبر 135 و 136 وفاقی حکومت کو بھیجنے کی منظوری دیدی گئی۔