شرجیل انعامیمن نے3کروڑ روپے کا چیک سندھ اسکواش چیمپئن کے عہدیدار عدنان اسد کے حوالے کردیا

کراچی (اُردو پوائنٹ اخبارتازہ ترین - اے پی پی۔ 29 مارچ2025ء) سندھ کے سینئر وزیربرائے اطلاعات، ٹرانسپورٹ و ماس ٹرانزٹ شرجیل انعام میمن نے حکومت سندھ کی جانب سے 3کروڑ روپے کا چیک سندھ اسکواش چیمپئن کے عہدیدار عدنان اسد کے حوالے کیا۔ہفتہ کو جاری اعلامیہ کے مطابق شرجیل انعام میمن نے کہا کہ حکومت سندھ کھیلوں کے فروغ کیلئے ہر ممکن اقدامات کر رہی ہے، انڈر 23اسکواش چیمپئن شپ کے انعقاد سے دنیا بھر کے کھلاڑی کراچی آئیں گے جو نہ صرف کھیلوں کی ترقی میں معاون ہوگا بلکہ عالمی سطح پر پاکستان کا مثبت امیج اجاگر کرے گا۔

انہوں نے کہا کہ 35ممالک کے کھلاڑی اس ایونٹ میں شرکت کر رہے ہیں، جن میں22ممالک کی خواتین کھلاڑی بھی شامل ہیں۔انہوں نے کہا کہ یہ چیمپئن شپ 80ممالک میں براہِ راست دکھائی جائے گی، جس سے پاکستان خصوصا کراچی کا مثالی ماحول نمایاں ہوگا۔

(جاری ہے)

شرجیل انعام میمن نے کہا کہ حکومت سندھ کھیلوں کی سرپرستی جاری رکھے گی اور اسپورٹس ٹورزم کے فروغ کیلئے عملی اقدامات کر رہی ہے۔

انہوں نے کہا کہ سندھ حکومت نے اس ایونٹ کیلئے 30ملین روپے مختص کیے ہیں تاکہ عالمی معیار کے مطابق انعقاد ممکن بنایا جا سکے۔ انہوں نے کہا کہ چند دن پہلے پیپلز پارٹی کے چیئرمین بلاول بھٹو نے "آئی ورک فار سندھ"پورٹل کا افتتاح کیا جو پاکستان کا واحد پورٹل ہے جہاں پبلک اور پرائیویٹ سیکٹر کی نوکریاں دستیاب ہیں۔ اب تک14لاکھ افراد اس پورٹل کو استعمال کر چکے ہیں جبکہ 2ہزارسے زائد نوکریوں کیلئے 36ہزار833درخواستیں جمع کرائی جا چکی ہیں۔

انہوں نے کہا کہ کووڈ کے بعد "ورک فرام ہوم"کا تصور بھی متعارف کرایا گیا، جس میں فوڈ ڈلیوری سمیت دیگر سہولیات فراہم کی جا رہی ہیں۔ اس موقع پرعدنان اسد نے سندھ حکومت کی حمایت پر اظہارِ تشکر کرتے ہوئے کہا کہ پاکستان میں انڈر 23ورلڈ اسکواش چیمپئن شپ کا انعقاد ایک تاریخی موقع ہے۔ انہوں نے نجی کمپنیوں سے بھی تعاون کی اپیل کی تاکہ ایسے کھلاڑیوں کی مدد ہو سکے جو مالی طور پر کھیلوں کا سامان خریدنے سے قاصر ہیں۔

شرجیل انعام میمن نے کہا کہ جو بھی کھلاڑی چیمپئن شپ جیتے گا، اسے 60ہزار ڈالرز انعام دیا جائے گا۔ انہوں نے کہا کہ پاکستان ایک پرامن ملک ہے اورعالمی کھلاڑیوں کو یہاں آنے کی دعوت دی جاتی ہے تاکہ وہ خود اس کے خوشگوار ماحول کا تجربہ کریں۔اس موقع پر سیکریٹری کھیل عبدالعلیم لاشاری بھی موجود تھے۔