وفاقی وزیر منصوبہ بندی و ترقی احسن اقبال کا جدہ میں پاکستانی بزنس کمیونٹی کی جانب سے دئیے گئے استقبالیہ سے خطاب

اسلام آباد (اُردو پوائنٹ اخبارتازہ ترین - اے پی پی۔ 02 اپریل2025ء) وفاقی وزیر منصوبہ بندی و ترقی احسن اقبال نے جدہ میں پاکستانی بزنس کمیونٹی کی جانب سے دئیے گئے استقبالیہ سے خطاب کرتے ہوئے کہا ہے کہ اڑان پاکستان ملک کی ترقی کو پائیدار اور دیرپا بنیاد فراہم کرنے کا پروگرام ہے ،پاکستان کی تین اڑانیں عدم استحکام کی بدولت کریش ہو چکی ہیں،چوتھی اڑان کی پوری قوم کو حفاظت کرے گی، اب مزید کریش کی گنجائش نہیں۔

وزارت منصوبہ بندی کی جانب سے بدھ کو یہاں جاری اعلامیہ کے مطابق وفاقی وزیر نے کہا کہ ہمیں سیاسی لانگ مارچوں کو خیر باد کر کے اقتصادی لانگ مارچ کرنا ہے،قوموں کے تعلقات کو اقتصادی رشتے ہی لازوال بنیادیں فراہم کرتے ہیں ۔ احسن اقبال نے کہا کہ پاکستان اور سعودی عرب کے درمیان تجارت روابط بڑھانے میں مقامی کمیونٹی کردار ادا کرے۔

(جاری ہے)

انہوں نے مزید کہا کہ اڑان پاکستان کے پانچ نکاتی ایجنڈے میں برآمدات کے فروغ کو مرکزی اہمیت حاصل ہے،ہماری معاشی خودمختاری کا انحصار معیشت کے ڈالر کمانے کی صلاحیت پہ ہے۔

وفاقی وزیر احسن اقبال نے کہا کہ وزیر اعظم محمد شہباز شریف نے معیشت کو ڈھلوان سے اڑان کی جانب موڑ دیا ہے،ہر پاکستان کا فرض ہے کہ اپنی پوری صلاحیتیں معاشی اڑان کی کامیابی کے لئے وقف کردے۔ انہوں نے کہا کہ بیرون ملک مقیم پاکستانی قوم کا بہترین سرمایہ ہیں،دنیا ٹیکنالوجی کی بدولت تیزی سے بدل رہی ہے، ہمیں بھی خود کو بدلنا ہے،تحقیق اور ٹیکنالوجی کے شعبوں میں مسلمان پیچھے رہ گئے ہیں جس کی سزا مل رہی ہے،اڑان پاکستان ملک کی معیشت کو جدید ٹیکنالوجی سے جوڑے گا۔

احسن اقبال نے ملک کی ترقی کے لئے قومی یکجہتی، یگانگت اور اتحاد ناگزیر قرار دیتے ہوئے کہا کہ ایک سیاستدان نے پاکستانی قوم کو دنیا میں چور ڈاکو بنا کر پیش کیا،پاکستانی قوم کی اصل پہچان اسکی محنت اور ذہانت ہیں ،ہمیں محنت، ذہانت ،دیانت اور اعلیٰ معیار سے پاکستانی برانڈ دنیا میں منوانا ہے۔ احسن اقبال نے کہا کہ پاکستان کو خدا نے کھربوں ڈالر کے معدنیات سے نوازا ہے،حکومت نے بلوچستان میں معدنیات کی ترقی کے منصوبے شروع کئے ہیں،اس عمل سے بلوچستان کی ترقی کے دشمنوں کی نیندیں اڑ گئی ہیں،بلوچستان ترقی کرے گا اور پاکستان کا خوشحال ترین صوبہ بنے گا۔

انہوں نے کہا کہ ہمارے دیگر ممالک سے پیچھے رہنے کی وجہ سیاسی بے یقینی اور پالیسیوں کا عدم تسلسل ہے،ہمیں اپنی غلطیوں سے سیکھ کر ملک میں دوبارہ عدم استحکام پیدا نہیں ہونے دینا۔ احسن اقبال نے مزید کہا کہ حکومت نے دو لاکھ نوجوانوں کی سالانہ آئی ٹی میں تربیت کا پروگرام شروع کیا ہے،ایک ہزار زرعی ماہرین کو جدید زراعت کی تربیت کے لئے چین بھیجا جا رہا ہے،ہم 2035 تک پاکستان کو ایک کھرب ڈالر کی معیشت بنانے کا عزم رکھتے ہیں،پاکستان ہماری پہچان اور وطن ہے، اس پہ آنچ نہیں آنے دیں گے۔\932