مسلمانوں کو ہر سطح پر اتحاد ویکجہتی کی ضرورت ہے، پیر ارشدکاظمی

کراچی (اُردو پوائنٹ اخبارتازہ ترین - این این آئی۔ 03 اپریل2025ء) مسلمانوں کو دنیا بھر میں اپنے حقوق کی جدوجہد کے دوران ہر سطح پر اتحاد و یکجہتی کی ضرورت ہے۔یہ بات تحریک اہلسنّت پاکستان سندھ کی رابطہ کمیٹی کے چیئرمین پیر سید ارشدعلی شاہ کاظمی القادری نے صوبائی سیکریٹریٹ دارالعلوم سبحانیہ رحیمیہ شاہ لطیف ٹاؤن میں علماء، مشائخ اور کارکنان اہلسنّت سے ملاقات کے موقع پر گفتگو میں کہی۔

انہوں نے فلسطین، کشمیر اور ہندوستان میں مسلمانوں پر ہونے والے مظالم پر گہری تشویش کا اظہار کرتے ہوئے کہا کہ ان علاقوں میں مسلمانوں کے خلاف ظلم و ستم کا سلسلہ بند ہونا چاہیے۔ انہوں نے مزید کہا کہ عالمی برادری کو اس بات کا احساس ہونا چاہیے کہ مسلمانوں کے حقوق کی پامالی عالمی امن کے لیے خطرہ بن سکتی ہے۔

(جاری ہے)

ہمیں اپنی آواز بلند کرنی ہوگی اور عالمی سطح پر مسلمانوں کے حقوق کے لیے موثر اقدامات کرنے کی کوشش کرنی ہوگی۔

پیر سید ارشدعلی شاہ کاظمی القادری نے اپنے پیغام میں یہ بھی کہا کہ تحریک اہلسنّت پاکستان اپنے تمام تر وسائل اور توانائیوں کو بروئے کار لا کر مسلمانوں کے حقوق کے تحفظ کے لیے کام کرے گی اور تحریک کے لائحہ عمل میں کوئی کمی نہیں آنے دی جائے گی۔ ملاقات کے دوران علماء اور مشائخ نے پیر سید ارشدعلی شاہ کاظمی القادری کو عیدالفطر کی خوشیوں کے موقع پر مبارکباد پیش کی اور اپنے عزم و ہمت کو مزید مستحکم کرنے کا عہد کیا۔

اس موقع پر، آئندہ کے تحریکی لائحہ عمل پر تفصیلی مشاورت بھی کی گئی، جس میں تحریک کے مختلف پروگرامز اور منصوبوں پر غور کیا گیا۔پیر سید ارشدعلی شاہ کاظمی القادری نے تحریک اہلسنّت کے مختلف منصوبوں اور پروگرامز پر بات کی اور کارکنان کو موجودہ چیلنجز سے نمٹنے کے لیے اپنی تجاویز دیں۔ اس موقع پر تحریک اہلسنّت کے علماء، مشائخ اور کارکنان نے اپنے تجربات اور رائے پیش کی تاکہ تحریک کی آئندہ کی حکمت عملی کو مزید مضبوط بنایا جا سکے۔

ملاقات میں عالمی سطح پر مسلمانوں کی موجودہ صورتحال پر بھی تبادلہ خیال کیا گیا۔ خاص طور پر فلسطین اور کشمیر کی صورتحال پر گہری تشویش کا اظہار کیا گیا، جہاں مسلمان اپنے بنیادی حقوق کے لیے کئی دہائیوں سے جدوجہد کر رہے ہیں اور ان کے خلاف ظلم و جبر جاری ہے۔فلسطین میں اسرائیلی فوج کی جارحیت اور کشمیر میں بھارتی فوج کے ہاتھوں مسلمانوں کے حقوق کی پامالی نے عالمی سطح پر مسلمانوں کو شدید متاثر کیا ہے۔

پاکستان نے ہمیشہ ان مسائل پر عالمی سطح پر آواز اٹھائی ہے ۔ اس موقع پر تحریک اہلسنّت کے قائدین نے عالمی طاقتوں سے اپیل کی کہ وہ ان مسائل کو حل کرنے کے لیے موثر اقدامات کریں۔ملاقات میں ہندوستان میں مسلمانوں پر ہونے والے مظالم کی بھی مذمت کی گئی، خاص طور پر اس سال عید الفطر کے موقع پر مسلمانوں کو نماز عید کے دوران جو مشکلات پیش آئیں۔

ہندوستان میں مسلمانوں پر مذہبی تشدد، امتیازی سلوک اور ان کے حقوق کی مسلسل خلاف ورزی پر گہری تشویش کا اظہار کیا گیا۔ عید الفطر کے دن مسلمانوں کو نماز عید ادا کرنے میں مشکلات کا سامنا کرنا پڑا اور کئی مقامات پر مذہبی آزادی کی پامالی ہوئی۔پیر سید ارشدعلی شاہ کاظمی القادری نے اس صورتحال پر افسوس کا اظہار کرتے ہوئے کہا کہ مسلمانوں کو دنیا بھر میں مساوی حقوق ملنے چاہئیں اور کسی بھی ملک میں انہیں مذہب کی بنیاد پر ظلم کا نشانہ نہیں بنایا جانا چاہیے۔

تحریک اہلسنّت پاکستان کے رہنماؤں نے اس عزم کا اعادہ کیا کہ وہ پاکستان کی سرزمین پر ہر سطح پر مسلمانوں کے حقوق کے لیے جدوجہد جاری رکھیں گے اور عالمی سطح پر بھی مسلمانان عالم کے مسائل کے حل کے لیے کوششیں تیز کریں گے۔۔