شہید ذوالفقار علی بھٹو نے پاکستان کو ترقی، خودمختاری اور عوامی فلاح کے راستے پر گامزن کیا، صدرآصف زرداری

شہید بھٹو عظیم مدبر، جرات مند رہنما اور عوام کے حقیقی نمائندہ تھے، آج کے دن ہم عہد کرتے ہیں کہ پاکستان کو شہید بھٹو کے وژن کے مطابق ایک ترقی یافتہ، خودمختار اور عوام دوست ملک بنائیں گے،صدر مملکت کا شہید ذوالفقار علی بھٹو کی برسی کے موقع پر پیغام

فیصل علوی جمعہ 4 اپریل 2025 11:15

شہید ذوالفقار علی بھٹو نے پاکستان کو ترقی، خودمختاری اور عوامی فلاح ..

اسلام آباد(اردوپوائنٹ اخبار تازہ ترین۔04اپریل 2025)صدر مملکت آصف علی زرداری کا کہنا ہے شہید ذوالفقار علی بھٹو نے پاکستان کو ترقی، خودمختاری اور عوامی فلاح کے راستے پر گامزن کیا، شہید بھٹو ایک عظیم مدبر، جرات مند رہنما اور عوام کے حقیقی نمائندہ تھے، ذوالفقار علی بھٹو شہیدکے مشن کو جاری رکھیں گے،پاکستان پیپلزپارٹی کے بانی اور سابق وزیراعظم شہید ذوالفقار علی بھٹو کی برسی کے موقع پر اپنے پیغام میں صدر آصف علی زرداری نے ان کی خدمات، جدوجہد اور قربانیوں کو خراج عقیدت پیش کرتے ہوئے کہا کہ آج کے دن ہم عہد کرتے ہیں کہ پاکستان کو شہید بھٹو کے وژن کے مطابق ایک ترقی یافتہ، خودمختار اور عوام دوست ملک بنائیں گے۔

پاکستان کی خودمختاری، جمہوریت اور عوامی حقوق کے تحفظ کیلئے ہر ممکن اقدام کریں گے۔

(جاری ہے)

شہید ذوالفقار علی بھٹو نے قوم کو پہلا متفقہ آئین دیا۔ پاکستان کے ایٹمی پروگرام کی بنیاد رکھی، شہید بھٹو نے ملک کی خارجہ پالیسی کو ایک آزاد اور خودمختار تشخص دیا۔صدر مملکت آصف علی زرداری کااپنے پیغام میں مزید کہنا تھا کہ شہید ذوالفقار علی بھٹو کی قیادت میں پاکستان نے اسلامی سربراہی کانفرنس کی میزبانی کی۔

ان کا یہ بھی کہنا تھا کہ مسلم امہ کے اتحاد کی راہ ہموار کی۔ مزدوروں، کسانوں اور پسے ہوئے طبقے کو حقوق دیے ، انہیں بااختیار بنایا۔ شہید ذوالفقار علی بھٹو کے اقدامات کی بدولت تعلیم، صنعت اور دفاعی شعبے میں نمایاں پیش رفت ہوئی۔ ہم شہید ذوالفقار علی بھٹو کے مشن کو جاری رکھیں گے۔شہید ذوالفقار علی بھٹو نے پاکستان کے ایٹمی پروگرام کی بنیاد رکھی اور ملک کو متفقہ آئین دیا۔

خیال رہے کہ پاکستان پیپلزپارٹی کے بانی چیئرمین اور سابق وزیراعظم شہید ذوالفقار علی بھٹو کی آج 46 ویں برسی ہے۔برسی کی مرکزی تقریب گڑھی خدابخش میں منعقد ہوگی ۔پیپلزپارٹی گڑھی خدا بخش میں جلسہ کرے گی، جس کی تیاریاں جاری ہیں۔برسی کی تقریب سے پاکستان پیپلزپارٹی کے چیئرمین بلاول بھٹو زرداری جلسہ عام سے خطاب کرینگے۔برسی میں شرکت کیلئے ملک بھر سے جیالے گڑھی خدا بخش میں جمع ہوں گے۔ سندھ حکومت نے آج شہید ذوالفقار علی بھٹو کی برسی کی مناسبت سے صوبے میں عام تعطیل کا اعلان کیا ہے۔