حکومت نے ہر وعدہ پورا کیا،ہم گالم گلوچ کی نہیں ترقی کی سیاست پر یقین رکھتے ہیں، بیرسٹر دانیال چوہدری

خیبر پختونخوا حکومت کی نئی داستانیں سامنے آرہی ہیں،کرپشن کے پیسوں سے افواج پاکستان کے خلاف پروپیگنڈا کیاگیا، پریس کانفرنس

ہفتہ 5 اپریل 2025 20:15

اسلام آباد (اُردو پوائنٹ اخبارتازہ ترین - این این آئی۔ 05 اپریل2025ء)رکن قومی اسمبلی بیرسٹر دانیال چوہدری نے کہا ہے کہ حکومت نے ہر وعدے کو پورا کیا ہے، ہم گالم گلوچ کی نہیں ترقی کی سیاست پر یقین رکھتے ہیں،خیبر پختونخوا حکومت کی نئی داستانیں سامنے آرہی ہیں،کرپشن کے پیسوں سے افواج پاکستان کے خلاف پروپیگنڈا کیاگیا۔اسلام آباد میں پریس کانفرنس کرتے ہوئے بیرسٹر دانیال چوہدری نے کہا کہ معاشی استحکام سے ہی ملک مستحکم ہوتے ہیں، ہمیں تعمیری سیاست کی طرف جانا ہے۔

انہوں نے کہا کہ حکومت نے ہر وعدے کو پورا کیا ہے، پہلے بھی ہم نے ملک سے اندھیروں کا خاتمہ کیا، اب بھی پاکستانی عوام کو بجلی کے بلوں میں تاریخی رعایت دی۔ انہوں نے کہا کہ حکومت نے دن رات محنت کرکے عوام کو ریلیف دیا، ہم گالم گلوچ کی نہیں ترقی کی سیاست پر یقین رکھتے ہیں۔

(جاری ہے)

انہوں نے کہاکہ گردشی قرضوں میں سے 400 ارب روپے کے بقایا جات ادا کیے، آئی پی پیز کے ساتھ مذاکرات کے بعد بجلی کی قیمتوں میں نمایاں کمی کی۔

انہوں نے کہا کہ ہم نفرت اورجلاو گھیراو کی سیاست پر یقین نہیں رکھتے، خیبر پختونخوا حکومت میں کی نئی داستانیں سامنے آرہی ہیں۔انہوں نے کہا کہ باچا خان یونیورسٹی میں بوگس بورڈ بنایا گیا، سیکڑوں غیر قانونی بھرتیاں ہوئیں، خیبر پختونخوا میں بلین سونامی ٹری کے نام پر اربوں کی کرپشن کی گئی۔ انہوں نے کہا کہ خیبر پختونخوا حکومت نے کرپشن کے پیسوں سے افواج پاکستان کے خلاف پروپیگنڈا کیا۔ انہوں نے کہا کہ لیگی حکومت نے سرکاری ٹھیکے ای پورٹل پر منتقل کردیئے، کسانوں کو سستے ٹریکٹرز دیئے، نوجوانوں کو لیپ ٹاپ دیے جبکہ ایک صوبائی حکومت انھیں جلاو گھیراو سکھا رہی ہے۔