پی ٹی آئی کی سیاست مفادات کے گرد گھومتی ہے، بلال اظہر کیانی

پی ٹی آئی کو معیشت اور دہشت گردی جیسے قومی مسائل سے کوئی دلچسپی نہیں، وزیر مملکت

اتوار 6 اپریل 2025 16:40

اسلام آباد (اُردو پوائنٹ اخبارتازہ ترین - این این آئی۔ 06 اپریل2025ء)وزیر مملکت برائے ریلوے بلال اظہر کیانی نے کہا ہیکہ پاکستان تحریک انصاف (پی ٹی آئی) اپنے ذاتی ایجنڈا پر قائم ہے۔نجی ٹی وی سے گفتگو کرتے ہوئے انہوں نے کہا کہ پی ٹی آئی کو معیشت اور دہشت گردی جیسے قومی مسائل سے کوئی دلچسپی نہیں۔انہوںنے کہاکہ جہاں حکومت نے مذاکرات کی متعدد دعوتیں دی ہیں، وہیں پی ٹی آئی مسلسل تعمیری کردار ادا کرنے میں ناکام رہی ہے۔

انہوں نے کہا کہ ان کی سیاست اپنے مفاد کے گرد گھومتی ہے،پی ٹی آئی نے قومی اہمیت کے معاملات پر کوئی سنجیدگی نہیں دکھائی۔کنال منصوبے کے حوالے سیسوال کے جواب میں انہوں نے کہا کہ ماضی کی طرح اس مسئلے کو اتحادی شراکت داروں کے ساتھ اتفاق رائے سے حل کیا جائیگا،اتحادی شراکت داروں کے ساتھ ہمارا رابطہ برقرار ہے۔

(جاری ہے)

انہوںنے کہاکہ تمام قومی معاملات کو باہمی مشاورت سے حل کیا جاتا ہے، کام کی سطح پر مواصلاتی ذرائع کھلے اور فعال ہیں۔

انہوں نے اس اعتماد کا اظہار کرتے ہوئے کہا کہ یہ مسئلہ جلد ہی حل ہو جائیگا،مخلوط حکومت کی کامیابیوں پر روشنی ڈالتے ہوئے بلال اظہر کیانی نے کہا کہ پاکستان پیپلز پارٹی (پی پی پی) کے ساتھ اتحاد نے معیشت کو مستحکم کرنے اور ملک کو ترقی کی جانب گامزن کرنے میں کامیابی حاصل کی ہے۔ انہوں نے کہا کہ بجلی کی قیمتوں میں حالیہ کمی عوامی ریلیف کی طرف ایک قدم ہے، ایسے مزید اقدامات کیے جائیں گے۔