دینی مدارس رجسٹریشن پر پنجاب حکومت کی طرف سے پنجاب بھر کے ڈپٹی کمشنرز کو بھجوائی گئی ہدایات اور مراسلے کا خیر مقدم کرتے ہیں،زاہد محمود قاسمی

پیر 7 اپریل 2025 16:10

فیصل آباد (اُردو پوائنٹ اخبارتازہ ترین - اے پی پی۔ 07 اپریل2025ء) چیئرمین مرکزی علما کونسل و جنرل سیکرٹری انٹرنیشنل ختم نبوت موومنٹ پاکستان صاحبزادہ مولانا زاہد محمودقاسمی نے کہا ہے کہ وہ دینی مدارس رجسٹریشن پر پنجاب حکومت کی طرف سے پنجاب بھر کے ڈپٹی کمشنرز کو بھجوائی گئی ہدایات اور مراسلے کا خیر مقدم کرتے ہیں کیونکہ اس فیصلہ کے مثبت اثرات مرتب ہوں گے جبکہ وفاقی اور صوبائی حکومت نے مدارس سوسائیٹیز ترمیمی ایکٹ2024کی منظوری دے کر دینی مدارس اور دینی طبقات کے دل جیت لئے ہیں نیزوزیراعظم کی جانب سے بجلی کی قیمتوں میں کمی کا اعلان بھی قابل تحسین ہے جس سے عوام اور کاروباری و صنعتی افراد کو ریلیف ملے گا۔

صاحبزادہ مولانا زاہد محمودقاسمی نے وزیر اعظم پاکستان میاں محمد شہباز شریف کی جانب سے بجلی کی قیمتوں میں کمی کے اعلان کا خیر مقدم کرتے ہوئے کہا کہ بجلی سستی ہونے پر غریب آدمی کو ریلیف ملا ہے نیز ملک میں اس فیصلے سے معاشی استحکام آئے گاجس پر عسکری قیادت اور حکومت مبارک باد کی مستحق ہے۔

(جاری ہے)

انہوں نے کہا کہ اس اقدام سے ملک ترقی کی طرف سفر شروع کرے گا اور ملکی صنعت و تجارت، ذراعت کے شعبے میں عوام سکھ کا سانس لیں گے جبکہ مہنگائی کی شرح بھی کم ہوگی۔

انہوں نے مزید کہا کہ وفاقی حکومت کی طرف سے سوسائیٹیز رجسٹریشن ترمیمی ایکٹ2024 کی منظوری کے بعد ہوم ڈیپارٹمنٹ پنجاب نے دینی مدارس کی رجسٹریشن کی ہدایات جاری کی ہیں لہٰذا حکومت پنجاب کا یہ عمل انتہائی مستحسن ہے جسے مرکزی علماء کونسل پاکستان قدر کی نگاہ سے دیکھتی ہے۔انہوں نے کہا کہ اس فیصلے سے مدارس ایک نظم میں ہوں گے اور مزید اطمینان قلب سے معاشرے کے مستحق گھرانوں تک تعلیم کے زیور کو عام کرسکیں گے۔

انہوں نے کہا کہ پنجاب کے دینی مدارس الحمد للہ پہلے سے رجسٹرڈ بھی ہیں اور سالانہ آڈٹ بھی کرواتے ہیں اور مدارس میں انتہا پسندی اور دہشت گردی کی ہرگز ٹریننگ نہیں دی جاتی۔انہوں نے کہا کہ تمام اضلاع کے ڈپٹی کمشنر زحکومت پنجاب کی ہدایات کی روشنی میں دینی مدارس کی رجسٹریشن کے مرحلے کو آسان بنائیں۔