امریکا سے کشیدگی، ایرانی سپریم لیڈر نے مسلح افواج کو ہائی الرٹ کر دیا

ایران نے عراق، کویت، متحدہ عرب امارات، قطر، ترکی اور بحرین کو نوٹس جاری کردیا پڑوسی جو امریکی اڈوں کی میزبانی کرتے ہیں وہ فائرنگ لائن ہوسکتے ہیں،ایرانی اہلکار

منگل 8 اپریل 2025 12:56

تہران (اُردو پوائنٹ اخبارتازہ ترین - این این آئی۔ 08 اپریل2025ء)ایران میں امریکی صدر ڈونلڈ ٹرمپ کی جانب سے جوہری پروگرام پر مذاکرات کے دبائوو کے بعد مسلح افواج کو ہائی الرٹ کر دیا ہے۔غیر ملکی میڈیا کے مطابق امریکی صدر ڈونلڈ ٹرمپ کی جانب سے ایران پر جوہری پروگرام کے لیے مذاکرات پر دبائوو اور سفارتکاری ناکام ہونے کی صورت میں تہران پر حملے کی دھمکی کے بعد ایران کے سپریم لیڈر آیت اللہ علی خامنہ ای نے ملک کی مسلح افواج کو ہائی الرٹ کر دیا ہے۔

ایک ایرانی اہلکار نے خدشہ ظاہر کیا ہے کہ اس کے پڑوسی جو امریکی اڈوں کی میزبانی کرتے ہیں وہ فائرنگ لائن ہوسکتے ہیں۔انہوں نے کہا کہ تہران پہلے ہی عراق، کویت، متحدہ عرب امارات، قطر، ترکی اور بحرین کو نوٹس جاری کر چکا ہے اور ان پر زور دیا ہے کہ وہ ایران کے ممکنہ منصوبوں میں امریکا کی مدد نہ کریں۔

(جاری ہے)

تہران جو ٹرمپ سے براہ راست مذاکرات کے مطالبے کو مسترد کرتے ہوئے اس معاملے پر عمان کے ذریعہ بلواسطہ مذاکرات جاری رکھناچاہتا ہے۔

اس حوالے سے ایرانی اہلکارنے کہا کہ بالواسطہ مذاکرات ایران کے ساتھ سیاسی حل کے بارے میں واشنگٹن کی سنجیدگی کا جائزہ لینے کا ایک موقع فراہم کرتے ہیں۔اہلکار کے مطابق کوئی بھی مہم جوئی ان کے لیے سنگین نتائج لائے گی۔ ایرانی سپریم لیڈر آیت اللہ خامنہ ای نے ایران کی مسلح افواج کو ہائی الرٹ کر دیا ہے۔ایران کے وزیر خارجہ عراقچی بھی کہہ چکے ہیں کہ ایسے فریق کے ساتھ براہ راست مذاکرات بے معنی ہوں گے جو اقوام متحدہ کے چارٹر کی خلاف ورزی کرتے ہوئے مسلسل طاقت کا سہارا لینے کی دھمکی دے اور جو اس کے مختلف عہدیداروں کے متضاد موقف کا اظہار کرے۔

ایرانی وزارت خارجہ کے جاری بیان میں کہا گیا ہے کہ ہم سفارت کاری کے لیے پرعزم ہیں اور بالواسطہ مذاکرات کا راستہ آزمانے کے لیے تیار ہیں۔