سی سی پی او لاہور کی غیرقانونی طور پر مقیم افغان باشندوںکا انخلا ء یقینی بنانے کی ہدایت

منگل 8 اپریل 2025 18:17

لاہور(اُردو پوائنٹ اخبارتازہ ترین - این این آئی۔ 08 اپریل2025ء)سربراہ لاہور پولیس بلال صدیق کمیانہ کی زیر صدارت اقبال ٹاؤن اور صدر ڈویژنزکی کارکردگی کا جائزہ اجلاس منعقد ہوا۔ جس میں غیرقانونی طور پر مقیم افغان باشندوں کے انخلاء پر پیش رفت کا جائزہ لیا گیا۔ سی سی پی او لاہور نے غیرقانونی طور پر مقیم افغان باشندوںکے انخلا ء کو یقینی بنانے کی ہدایات جاری کیں۔

انہوں نے کہا کہ پاکستان سپر لیگ اور آئی سی سی وویمن کرکٹ ورلڈ کپ میچز کے فول پروف سکیورٹی انتظامات کئے جائیں۔ انہوں نے ایسٹر کے موقع پر مسیحی برادری کی سکیورٹی کے بہترین انتظامات یقینی بنانے کے عزم کا بھی اظہار کیا۔سی سی پی او لاہور نے اجلاس سے خطاب کرتے ہوئے کہا کہ کرپشن اور اختیارات سے تجاوز برداشت نہیں۔

(جاری ہے)

انہوں نے متعلقہ افسران کو ہدایات جاری کرتے ہوئے کہا کہ منشیات فروشی کے خلاف بڑے پیمانے پر کریک ڈاؤن کیا جائے۔

بلال صدیق کمیانہ نے کہا کہ آئس نوجوان نسل کے لئے زہر ِقاتل ہے اس مکروہ دھندے کا خاتمہ یقینی بنایا جائے گا۔سی سی پی او لاہور نے کہا کہ ایس ایچ اوز اورانچارج انوسٹی گیشنز رابریز اورپراپرٹی کرائم کے مقدمات کوبرق رفتاری سے حل کریں۔انہوں نے کہا کہ ہائی پروفائل کیسز کے حل کیلئے پروفیشنل اور محنتی پولیس آفیشلز پر مشتمل ٹیمیں تشکیل دیں۔

سی سی پی او لاہورنے اقبال ٹاؤن ڈویژن میں کرائم کنٹرول پر اطمینان کا اظہار کرتے ہوئے کہا کہ شہر میں بیرئرزکی تنصیب اور موثرحکمت عملی سے جرائم پر قابو پانے میں مدد ملی ہے۔ انہوں نے کہا کہ ہوٹل آئی،ٹریول آئی سافٹ وئیرز کی مدد سے اشتہاریوں کو قانون کے شکنجے میں لایا جائے۔انہوں نے مزید کہا کہ مجرمان کی گرفتاری کے لیے آپریشنز اور انوسٹی گیشن ونگز مشترکہ طور پر ریڈز کریں ۔اجلاس میں ڈی آئی جی(انوسٹی گیشن)ذیشان رضا، ڈی آئی جی (ایڈمن)عمران کشور،ڈی آئی جی(آپریشنز)فیصل کامران، ایس ایس پی (انوسٹی گیشن)محمد نوید، ایس ایس پی (آپریشنز)تصور اقبال ، اقبال ٹاؤن اورصدر ڈویژنز کے ایس پیز، اے ایس پیز،سرکل افسران، ایس ایچ اوز اور انچارجزنے شرکت کی۔