امریکی کمپنیوں کو معدنی شعبے میں سرمایہ کاری کے مواقع سے مستفید ہونا چاہیے، وزیراعظم

وزیراعظم سے امریکی محکمہ خارجہ کے سینئر عہدیدار ایرک میئر کی قیادت میں وفد کی ملاقات ، ڈونلڈ ٹرمپ اور انکی انتظامیہ کے ساتھ کام کرنے کے خواہاں ہیں،سرمایہ کاری اور تجارتی شعبے میں تعاون بڑھانا ضروری ہے، وزیراعظم کی امریکی وفد سے ملاقات میں گفتگو

فیصل علوی بدھ 9 اپریل 2025 11:27

امریکی کمپنیوں کو معدنی شعبے میں سرمایہ کاری کے مواقع سے مستفید ہونا ..

اسلام آباد(اردوپوائنٹ اخبار تازہ ترین۔09اپریل 2025)وزیراعظم شہباز شریف نے کہا ہے کہ امریکی کمپنیوں کو معدنی شعبے میں سرمایہ کاری کے مواقع سے مستفید ہونا چاہیے،پاکستان کے معدنیات کے شعبے میں وسیع استعداد موجود ہے،وزیراعظم شہباز شریف سے امریکی محکمہ خارجہ کے سینئر عہدیدار ایرک میئر نے وفد کے ہمراہ ملاقات کی،وفد میں سینئر بیورو آفیشل اور قائم مقام اسسٹنٹ سیکرٹری، بیورو آف ساوتھ اینڈ سینٹرل ایشین افیئرز، یو ایس ڈیپارٹمنٹ آف اسٹیٹ بھی شامل تھے۔

اس موقع پر نائب وزیراعظم و وزیر خارجہ محمد اسحاق ڈار، وفاقی وزیر برائے اقتصادی امور احد خان چیمہ، وزیر پٹرولیم علی پرویز ملک، معاون خصوصی طارق فاطمی اور دیگر اعلیٰ سطح کے سرکاری حکام نے بھی اجلاس میں شرکت کی۔

(جاری ہے)

وزیراعظم شہباز شریف نے فورم میں امریکی وفد کی شرکت کا خیرمقدم کرتے ہوئے کہا کہ امریکی کمپنیاں پاکستان میں معدنیات کے شعبے سے استفادہ کریں۔

پاکستان کے معدنیات کے شعبے میں وسیع استعداد موجود ہے۔ امریکی کمپنیوں کو اس ترجیحی شعبے میں سرمایہ کاری کے مواقع سے مستفید ہونا چاہیے۔انہوں نے کہا کہ امریکی صدرڈونلڈ ٹرمپ اور انکی انتظامیہ کے ساتھ کام کرنے کے خواہاں ہیں۔سرمایہ کاری اور تجارتی شعبے میں تعاون بڑھانا ضروری ہے۔ انسداد دہشتگردی سمیت باہمی دلچسپی کے شعبوں میں بھی تعاون بڑھانا چاہتے ہیں۔

وزیراعظم نے دوطرفہ تناظر اور علاقائی امن و سلامتی کے حوالے سے پاکستان اور امریکا کے تعلقات کی اہمیت کو اجاگر کرتے ہوئے تجارت اور سرمایہ کاری کے ساتھ ساتھ انسداد دہشت گردی سمیت باہمی دلچسپی کے شعبوں میں تعاون بڑھانے کی اہمیت پر زور دیا۔ قائم مقام اسسٹنٹ سیکرٹری میئر نے پاکستان منرل انویسٹمنٹ فورم کے کامیاب انعقاد پر پاکستان کو مبارکباد دی۔

انہوں نے پاکستان کے معدنیات کے شعبے کی وسیع استعداد کا اعتراف کیا اور امریکی کمپنیوں کی جانب سے اس شعبے میں سرمایہ کاری میں دلچسپی سے آگاہ کیا۔ امریکی وفد نے کہا کہ امریکا پاکستان کے ساتھ دوطرفہ تعلقات کے مزید فروغ کا خواہاں ہے۔انہوں نے مشترکہ دلچسپی کے امور پر پاکستان کے ساتھ کام کرنے کی امریکی خواہش کا بھی اظہار کیا۔ انہوں نے کہا کہ امریکا پاکستان کے ساتھ دوطرفہ تعلقات کے مزید فروغ کا خواہاں ہے۔امریکی وفد نے جعفر ایکسپریس پرہونے والے حملے کی شدید مذمت بھی کی۔