وساکھی میلہ ننکانہ صاحب اختتامی ارداس (دعا )کے ساتھ اختتام پذیر

منگل 15 اپریل 2025 21:51

لاہور (اُردو پوائنٹ اخبارتازہ ترین - این این آئی۔ 15 اپریل2025ء) ننکانہ صاحب میں جاری وساکھی میلے کی تقریبات اختتامی ارداس (دعا) کے ساتھ پرامن انداز میں مکمل ہو گئیں۔ اختتامی دعا میں پاکستان کی سلامتی، امن اور خوشحالی کے لیے خصوصی دعائیں کی گئیں۔وساکھی میلہ میں شرکت کے بعد سکھ یاتری ننکانہ صاحب سے حسن ابدال اور کرتارپور روانہ ہو گئے۔ روانگی کے موقع پر ڈپٹی کمشنر محمد تسلیم اختر راؤ اور ڈی پی او سید ندیم عباس نے سکھ یاتریوں کو الوداع کہا۔

سکھ یاتریوں کی روانگی سخت سکیورٹی حصار میں عمل میں لائی گئی۔سکھ یاتریوں نے ننکانہ صاحب میں دی گئی رہائش، لنگر، سکیورٹی اور ٹرانسپورٹ کے اعلیٰ انتظامات پر وزیراعلیٰ پنجاب محترمہ مریم نواز شریف اور ضلعی انتظامیہ کا دل سے شکریہ ادا کیا۔

(جاری ہے)

یاتریوں کا کہنا تھا کہ وہ گورونانک کی دھرتی سے محبت اور پیار لے کر واپس جا رہے ہیں اور پاکستانی عوام کی مہمان نوازی و عزت کو کبھی نہیں بھلا پائیں گے۔

سکھ یاتریوں نے اس بات پر زور دیا کہ پاکستان میں اقلیتوں کو مکمل مذہبی آزادی حاصل ہے، تمام مذاہب کے ماننے والے بھائی چارے اور محبت سے زندگی گزار رہے ہیں، اور ملک کے بارے میں کیا جانے والا منفی پروپیگنڈہ حقیقت کے برعکس ہے۔ڈپٹی کمشنر محمد تسلیم اختر راؤ نے کہا کہ سکھ یاتریوں کی خدمت کرنا ہمارے لیے باعثِ فخر ہے اور بابا گورونانک کا پیغام محبت، بھائی چارہ اور انسانیت ہے، جس پر عمل پیرا ہو کر ہم ایک پرامن اور خوشحال معاشرہ قائم کر سکتے ہیں۔