Live Updates

ملتان سلطانز کو شکست، اسلام آباد یونائیٹڈ مسلسل تیسری فتح حاصل کرنے میں کامیاب

203 رنز کے ہدف کے تعاقب میں رضوان 11 کی بیٹنگ لائن ایک مرتبہ پھر ناکام، پوری ٹیم 155 رنز پر پویلین لوٹ گئی

محمد علی جمعرات 17 اپریل 2025 00:26

راولپنڈی (اردو پوائنٹ تازہ ترین اخبار ۔ 16 اپریل 2025ء ) ملتان سلطانز کو شکست، اسلام آباد یونائیٹڈ مسلسل تیسری فتح حاصل کرنے میں کامیاب 203 رنز کے ہدف کے تعاقب میں رضوان 11 کی بیٹنگ لائن ایک مرتبہ پھر ناکام، پوری ٹیم 155 رنز پر پویلین لوٹ گئی، 47 رنز کی فتح کے ساتھ شاداب 11 پوائنٹس ٹیبل پر اپنی پہلی پوزیشن برقرار رکھنے میں کامیاب۔ پاکستان سپر لیگ کے دسویں ایڈیشن کے ساتویں میچ میں دفاعی چیمپئن اسلام آباد یونائیٹڈ نے ملتان سلطانز کو جیت کے لیے 203 رنز کا ہدف دیا۔

ملتان سلطانز نے ٹاس جیت کر دفاعی چیمپئن کو بیٹنگ کی دعوت دی تھی۔ اسلام آباد یونائیٹڈ نے مقررہ 20 اوورز میں 6 وکٹ پر 202 رنز بنائے۔ یونائیٹڈ کی طرف سے صاحبزادہ فرحان نے 53، کولن منرو نے 48 اور حیدر علی 33 بناکر نمایاں بیٹر رہے جبکہ جیسن ہولڈر32 رنز کے ناقابل شکست رہے۔

(جاری ہے)

ملتان سلطانز کی طرف سے کرس جارڈن نے 2، ڈیوڈ ویلی، اُسامہ میر، عبید شاہ اور محمد حسنین نے 1،1 وکٹ حاصل کی۔

قبل ازیں بارش کے باعث راولپنڈی کرکٹ اسٹیڈیم کی آؤٹ فیلڈ گیلی ہونے کے باعث ٹاس تاخیر کا شکار ہوگیا تھا، تاہم اوورز میں کوئی کٹوتی نہیں کی گئی۔ امپائرز نے 7 بج کر 40 منٹ پر پچ کا معائنہ کیا تھا جس کے بعد فیصلہ کیا گیا تھا کہ ٹاس سوا 8 بجے اور میچ کا آغاز پونے 9 بجے ہوگا۔ میچ سے قبل دفاعی چیمپئن اسلام یونائیٹڈ ٹورنامنٹ میں اپنے دونوں میچ جیت کر پوائنٹس ٹیبل پر سرفہرست تھی جبکہ ملتان سلطانز اپنے پہلے میچ میں شکست کے بعد 5ویں پوزیشن پر تھی۔

اسلام آباد یونائیٹڈ کا اسکواڈ اینڈریز گوس، صاحبزادہ فرحان، کولن منرو، حیدرعلیل، اعظم خان ( وکٹ کیپر)، شاداب خان ( کپتان)، جیسن ہولڈر، محمد شہزاد، عماد وسیم، نسیم شاہ، ریلے میریڈتھ پر مشتمل تھا جب کہ ملتان سلطانز کا اسکواڈ محمد رضوان ( کپتان، وکٹ کیپر )، شے ہوپ، عثمان خان، افتخار احمد، کامران غلام، مائیکل بریسویل، ڈیوڈ ویلی، کرس جورڈن، اسامہ میر، عبید شاہ، محمد حسنین پر مشتمل تھا۔