Live Updates

سیاسی جماعتوں کو سیاسی لڑائی کو سکیورٹی معاملات سے نتھی نہیں کرنا چاہیئے

خیبرپختونخواہ ربلوچستان میں جو دہشتگرد کاروائیاں کررہے ہیں، ان کو ”را“ کی حمایت اور فنڈنگ حاصل ہے، سیاسی اونرشپ یہ ہے کہ دہشتگردوں کیخلاف پوری قوم کی آواز آرمی چیف اور سکیورٹی فورسز جیسی ہونی چاہیئے۔ وفاقی مشیر رانا ثناء اللہ

ثنااللہ ناگرہ جمعرات 17 اپریل 2025 23:54

سیاسی جماعتوں کو سیاسی لڑائی کو سکیورٹی معاملات سے نتھی نہیں کرنا چاہیئے

اسلام آباد ( اردوپوائنٹ اخبار تازہ ترین۔ آئی پی اے ۔ 17 اپریل 2025ء ) وفاقی مشیرسیاسی امور رانا ثناء اللہ نے کہا ہے کہ سیاسی جماعتوں کو سیاسی لڑائی کو سکیورٹی معاملات سے نتھی نہیں کرنا چاہیئے،خیبرپختونخواہ ربلوچستان میں جو دہشتگرد کاروائیاں کررہے ہیں، ان کو ”را“ کی حمایت اور فنڈنگ حاصل ہے، سیاسی اونرشپ یہ ہے کہ دہشتگردوں کیخلاف پوری قوم کی آواز آرمی چیف اور سکیورٹی فورسز جیسی ہونی چاہیئے۔

انہوں نے سماء نیوز کے پروگرام میں گفتگو کرتے ہوئے کہا کہ پی ٹی آئی کو اپنے معاملات کو ٹھیک کرنا چاہیئے، بانی جن کو ملاقات کیلئے بلائیں ان کے علاوہ کسی کو ملاقات کیلئے جیل جانا ہی نہیں جانا چاہیئے۔سلمان اکرم راجا پی ٹی آئی کیلئے معتبر ہیں وہ جن بندوں کو کہیں وہ ملاقات کیلئے جائیں۔

(جاری ہے)

یہ سارا کھیل میڈیا میں خبر بنانے کیلئے ہورہا ہے، عمران خان کی بہنیں قابل احترام ہیں، خاتون کا معاشرے میں ایک مقام ہے، ان کے بقول جیل والوں نے 6 لوگوں کی زبردستی ملاقات کروائی، تو پھر ان لوگوں نے کیوں ملاقات کی؟ انہوں نے کہا کہ میں متعدد بار کہہ چکا ہوں کہ یہ سیاسی ایشو ہے، سیاسی جماعتوں کو آپس میں بیٹھ کر معاملات کو حل کرنا چاہیئے۔

لیکن پچھلے پانچ دس سال کی تاریخ دیکھیں تو فیصلہ کرسکتے ہیں کہ کون اس سیاسی عمل اور مذاکرات سے انکاری رہا ہے۔رانا ثناء اللہ نے کہا کہ سیاسی جماعتوں کو سیاسی لڑائی کو سکیورٹی معاملات سے نتھی نہیں کرنا چاہیئے، دہشتگردی کا خاتمہ اور امن وامان کی صورتحال ریاست کی بقاء کا معاملہ ہے، یہ پاکستان کے وقار کا معاملہ ہے، خیبرپختونخواہ ربلوچستان میں جو دہشتگرد کاروائیاں کررہے ہیں وہ دشمنوں کے ساتھ مل کر کاروائیاں کررہے ہیں، ان کو ”را“ کی حمایت اور فنڈنگ حاصل ہے، وہ دہشتگرد افغانستان میں محفوظ پناہ گاہیں بنائے بیٹھے ہیں، وہاں وہ تیاری کرکے پاکستان میں دہشتگردی کی کاروائیوں میں ملوث ہیں، ان کے ساتھ کس طرح سیاسی بات ہوسکتی ہے، وہ بڑی سیدھی بات کرتے ہیں کہ ہم بلوچستان کو آزاد کرانا چاہتے ہیں، کے پی کے علاقوں کو بھی شامل کرنا چاہتے ہیں، ان کے خلاف کاروائیوں میں اگر کوئی جماعت اختلاف رکھتی ہے تو سامنے آئے اور بتائے کہ وہ دہشتگردوں کے ساتھ ہے۔

سیاسی اونرشپ یہی ہے کہ دہشتگردوں کے خلاف نمٹنے کا عزم مسلح افواج اور آرمی چیف نے جو کیا ہے، وہ پوری قوم کی آواز ہونی چاہیئے۔