آندھی، جھکڑ، ژالہ باری، گرج چمک کیساتھ موسلادھار بارش کی پیشن گوئی

طوفانی موسم کے باعث کمزور انفرا سٹرکچر کو نقصان کا خطرہ ہے، محکمہ موسمیات نے الرٹ جاری کر دیا

محمد علی جمعہ 18 اپریل 2025 20:40

لاہور (اُردو پوائنٹ اخبارتازہ ترین۔ 18 اپریل2025ء) آندھی، جھکڑ ،ژالہ باری ، گرج چمک کیساتھ موسلادھار بارش کی پیشن گوئی، محکمہ موسمیات نے الرٹ جاری کر دیا۔ تفصیلات کے مطابق محکمہ موسمیات نے متنبہ کیا ہے کہ جمعہ 18 اپریل کی رات سے 20 اپریل کی صبح تک ملک کے مختلف علاقوں میں آندھی،جھکڑ،ژالہ باری ،گرج چمک اور تیز،موسلادھار بار ش کے باعث کمزور انفرا سٹرکچر (بجلی کے کھمبے، درخت، گاڑیوں، سولر پینل وغیرہ) کو نقصان پہنچنے کا خطرہ ہے۔

این ڈی ایم اے کے الرٹ میں بھی آئندہ 12 گھنٹوں میں پنجاب، اسلام آباد اور شمالی علاقہ جات میں گرج چمک کے ساتھ موسلادھار بارش، آندھی اور متعد د مقامات پر ژالہ باری کا امکان ظاہر کیا ہے۔ بتایا گیا ہے کہ بالائی پنجاب میں اٹک، چکوال، گجرات، جہلم، وسطی پنجاب میں فیصل آباد، حافظ آباد، جھنگ، خوشاب، میانوالی، لاہور، نارووال، ساہیوال، سرگودھا اور شیخوپورہ میں گرج چمک کے ساتھ موسلادھار بارش اور آندھی کا امکان ہے۔

(جاری ہے)

این ڈی ایم اے نے خبردار کیا ہے کہ موسلادھار بارش اور طوفانی ہوائیں کمزور درختوں کے گرنے کے باعث بجلی کی بندش اور آندھی اور ژالہ باری کے باعث کمزور عمارتوں، چھتوں، گاڑیوں اور بجلی کے کھمبوں کو نقصان کا اندیشہ ہے،اسی طرح ژالہ باری سے کھڑی فصلوں کوبھی نقصان کا شدید خطرہ ہوسکتا ہے، شمالی علاقہ جات بشمول دیر، سوات، کوہستان، چترال، مانسہرہ، کرم، خیبر، مہمند، باجوڑ اور وادی نیلم کے ندی نالوں میں 19 اور 20اپریل کے دوران ممکنہ سیلابی صورت حال کی بھی پیشگوئی کی گئی ہے۔

این ڈی ایم اے نے سیاحوں اور مسافروں سے درخواست کی ہے کہ وہ موسم کی تازہ ترین خبروں سے باخبر رہیں اور سفرکے آغاز سے قبل سڑکوں کی صورت حال کا جائزہ ضرور لیں اور تیز بارش کے دوران غیر ضروری نقل و حرکت سے گریز کریں۔