خیبر پختونخوا میں قانون کی عملداری کمزور، ایچ آر سی پی

اسلام آباد (اُردو پوائنٹ ۔ DW اردو۔ 01 جولائی 2025ء) انسانی حقوق کمیشن برائےپاکستان (ایچ آر سی پی) کے مطابق گزشتہ ایک برس کے دوران ملکی جمہوری معیار میں نمایاں کمی دیکھنے میں آئی، جس کی بنیادی وجہ عام انتخابات کی شفافیت پر بڑھتے ہوئے خدشات اور پارلیمانی نظام کی کمزوری ہے۔

ایچ آر سی پی کی جانب سے صوبہ خیبر پختونخوا میں 2024ء کے دوران انسانی حقوق کی صورت حال کے حوالے سے جاری کردہ سالانہ رپورٹ میں بتایا گیا کہ گزشتہ ایک برس میں صوبے میں دہشت گردی کے واقعات میں ساٹھ فیصد اضافہ ہوا۔

رپورٹ کے مطابق اسی عرصے کے دوران فرقہ ورانہ فسادات، جائیداد کے معاملات پر جھگڑوں اور قبائلی دشمنیوں میں ضلع کُرم سرفہرست رہا، جہاں قلیل عرصے میں تصادم کی وجہ سے ڈھائی سو سے زیادہ ہلاکتیں ہوئیں۔

(جاری ہے)

اس انسانی بحران نے اس وقت شدت اختیار کی، جب راستوں کی بندش کی وجہ سے اشیا خوردو نوش اور ادویات کی قلت پیدا ہوگئی۔

رپورٹ میں مزید کہا گیا ہے کہ خیبر پختونخوا میں جہاں فرقہ ورایت میں اضافہ ہوا، وہیں توہین مذہب میں ایک خاتون سمیت 77 افراد کے خلاف مقدمات درج کیے گئے، جن میں 49 ملزمان کو حراست میں لیا گیا۔ رپورٹ کے مطابق گزشتہ برس سوات میں ایک شخص کو توہین مذہب کے الزام میں مشتعل ہجوم نے تشدد کرکے قتل کر دیا۔

محدود ہوتی شہری آذادیاں

ایچ ا‌ٓر سی پی کی اس سالانہ رپورٹ کے مطابق گزشتہ برس شہریوں کی آزدیوں کو بھی مزید محدود کرکے رکھ دیا گیا۔

رپورٹ میں سرکاری اعداد و شمار کی بنیاد پر بتایا گیا کہ صوبے میں جبری گمشدگیوں کے کم از کم 105 نئے کیسز درج کیے گئے، جن پر عدلیہ کو بار بار مداخلت کرنا پڑی۔

رپورٹ کے مطابق یہ سال پاکستان تحریک انصاف (پی ٹی آئی) کے لیے بدترین ثابت ہوا، جس کے متعدد کارکنوں کے انتخابات میں حصہ لینے کے لیے دائر کیے گئےکاغذات نامزدگی مسترد کر دیے گئے۔

پشاور ہائی کورٹ میں 38 ہزار سے زیادہ مقدمات زیر التوا ہیں، جن میں ایک بڑی تعداد توہین عدالت کے مقدمات کی ہے، جس میں پولیس اورسیاستدانوں کو فریق بنایا گیا ہے۔

صوبائی طرز حکومت میں بہتری کی ضرورت

ایچ آر سی پی کے صوبائی کوآرڈینیٹر پروفیسر سرفراز خان کے مطابق، ''صوبے میں بہتر طرز حکمرانی اور انسانی حقوق میں بہتری لانے کی اشد ضرورت ہے۔

ان کا مزید کہنا تھا کہ گذشتہ سال سیلابوں اور بارشوں سے ایک سو سے زیادہ اموات واقع ہوئیں۔

صنفی بنیاد پر تشدد میں اضافہ

ایچ آر سی پی کی اس رپورٹ میں خیبرپختونخوا میں صنفی بنیادوں پرتشدد میں بھی مسلسل اضافہ نوٹ کیا گیا۔گذشتہ سال کے اعداد وشمار کے مطابق صوبے کے مختلف اضلاع میں متعدد مردوں اورخواتین کوغیرت کے نام پر قتل کیا گیا۔

صوبے میں بچوں کی ایک بڑی تعداد سے مزدوری اورجبری مشقت بھی لی جا رہی ہے تاہم موثرقانون سازی اورموجود قوانین پرعمل درآمد نہ کیے جانے کی وجہ سے بھی بچوں کو تحفظ فراہم کرنے میں ناکامی کا سامنا رہا۔

افغان مہاجرین کے ساتھ سلوک

ہیومن رائٹس کمیشن آف پاکستان نے اپنی سالانہ رپورٹ میں وفاقی حکومت کی جانب سے پاکستان میں مقیم غیر قانونی افغان مہاجرین کی خیبر پختونخوا کے راستے بیدخلی کے دوران انسانی حقوق کو نظر انداز کرنے پر تشویش کا اظہار بھی کیا۔

رپورٹ کے مطابق پاکستان کے مختلف صوبوں میں غیر قانونی طور پر رہائش پزیرافغان پناہ گزینوں کوگرفتارکرکے انہیں خواتین اوربچوں سمیت ملک بدر کیا جارہا ہے۔ اس دوران بے سروسامانی میں بیدخل کیے جانے والے افغان باشندوں کے مسائل میں بے پناہ اضافہ دیکھنے میں آیا ہے۔

ایچ آر سی پی نے افغان مہاجرین خصوصاﹰ بچوں،خواتین اور بزرگ شہریوں کے انسانی حقوق کا خیال رکھنے پر زور دیا۔