حکومت نے بجٹ کے بعد رات کی تاریکی میں پٹرول بم گِراکر عوام پر ایک اور ظلم کیا

لاہور (اُردو پوائنٹ اخبارتازہ ترین۔  یکم جولائی 2025ء) نائب امیر جماعت اسلامی، سیکرٹری جنرل مِلی یکجہتی کونسل نے کہا ہے کہ حکومت نے بجٹ کے فوری بعد رات کی تاریکی میں عوام پر پٹرول بم گِرا کر مہنگائی، لوڈشیڈنگ اور شدید گرمی سے بدحال اور نڈھال عوام پر ایک اور ظلم کیا ہے۔ آئندہ پندرہ روز کے لیے پٹرول کی فی لٹر قیمت میں 8 روپے 36 پیسے اور ڈیزل 10 روپے 39 پیسے فی لٹر کے بڑے اضافہ سے مہنگائی کی نئی لہر آئے گی۔

حسبِ دستور پٹرولیم مصنوعات کی قیمتوں میں اضافہ کیساتھ ہی ٹرانسپورٹ کرایوں میں بھی اضافہ ہوگا جس سے ضروریاتِ زندگی کی ہر چیز مہنگی ہوگی اور عام آدمی کی زندگی مزید مشکلات کا شکار ہوجائے گی۔ قبل ازیں گزشتہ روز حکومت نے گیس کے گھریلو صارفین کے لیے فکسڈ چارجز اور بقیہ صارفین کے لیے قیمت میں اضافہ کا اعلان کیا تھا۔

(جاری ہے)

عالمی مارکیٹ میں خام تیل کی قیمتیں کم ہورہی ہیں لیکن حکومت آئی ایم ایف سے لیے گئے قرضوں پر سُود اور اپنی عیاشیوں کے خرچے پوری کرنے کے لیے عوام کو نچوڑ رہی ہے۔

حکومت نے حال ہی میں ارکانِ اسمبلی کی تنخواہوں میں 300 فیصد تک اضافہ کیا اور پارلیمنٹ کے ذریعے رُول میں ترمیم کرکے وفاقی کابینہ ارکان کو اپنی تنخواہوں میں من پسند اضافے کی کُھلی چُھوٹ (بلینک چیک) دے دیا۔ مقتدر اشرافیہ ملکی دولت پر عیاشیاں کررہی ہے جبکہ عام آدمی کی زندگی مشکل سے مشکل تر بنائی جارہی ہے۔ حکومت اور اشرافیہ عوام کو مہنگائی اور ظلم کی چکی میں پِیسنا بند کرے اور اپنی عیاشیوں، مراعات، کرپشن اور غیرترقیاتی اخراجات میں کمی کرے۔

عوام پر ٹیکسوں کا بوجھ ڈالنے سے نہیں، بلکہ زراعت و صنعت کی ترقی، برآمدات میں اضافہ اور وسائل کی منصفانہ تقسیم کے ذریعے معیشت کی حقیقی بحالی ممکن ہوگی۔ لیاقت بلوچ نے مِلی یکجہتی کونسل کے مرکزی رہنما، ہدیۃالہادی کے رہبر پیر سیّد ہارون گیلانی سے ملاقات کی اور 7 محرم الحرام کو درگاہ حضرت میاں میر کے عوامی ہال میں شہادتِ حسینؓ کانفرنس کے انعقاد کے حوالے سے گفتگو کی۔

مِلی یکجہتی کونسل اور ہدیۃالہادی کے زیراہتمام ماہِ محرم کی اہم کانفرنس سے سُں ی اور شیعہ علماء، قائدین خطاب کریں گے، جو اتحادِ اُمت کے لیے بڑا پیغام ہوگا۔ شہدائے کربلا اور خانوادہ خاتم الانبیاءﷺ کی قربانیوں کا اصل پیغام ہی یہ ہے کہ باطل کے مقابلہ میں اہلِ حق استقامت سے پُرامن مزاحمت کریں، باطل مِٹ جاتا ہے، رُسوا ہوتا ہے اور اہلِ حق سُرخرو اور دائمی عزت پاتے ہیں۔

لیاقت بلوچ نے اہلِ سُنت کے علماء کرام کے مشترکہ اجلاس میں شرکت کی، مولانا زاہد الراشدی، مولانا عبدالرؤف فاروقی اور دیگر علماء نے شرکت کی۔ اجلاس میں فیصلہ کیا گیا کہ مِلی یکجہتی کونسل کا فرقہ وارانہ ہم آہنگی اور مختلف مسالک اور مِلی مؤقف رکھنے والوں کے مابین اتفاقِ رائے پید اکرنے کے لیے ضابطہ اخلاق بڑا جامع اور ہمہ گیر اور تمام مسالک کی جماعتوں کے اکابرین کی مشترکہ دستاویز ہے۔

اہلِ سُنت کی رابطہ کمیٹی مولانا عبدالرؤٖف فاروقی کی سربراہی میں ضابطہ اخلاق کے نفاذ کے لیے کوشاں رہے گی تاکہ دینی مسالک کی جماعتوں کے درمیان اتفاق، باہمی احترام اور پاکستان کو قیامِ پاکستان کے مقاصد کے تحت اسلامی نظام کا مضبوط قلعہ بنایا جاسکے۔ لیاقت بلوچ نے لاہور میں زیرتعلیم فلسطین، کشمیر، بلوچستان اور سندھ کے طلبہ وفود سے ملاقاتوں میں کہا کہ غزہ فلسطین پر امریکہ اور صیہونیوں کا ناجائز قبضہ، بیت المقدس سے عالمِ اسلام کی دستبرداری مسلم ممالک کے لیے بڑا خطرناک ہوگا۔

فلسطین فلسطینیوں کا اور کشمیر کشمیریوں کا ہے۔ تین کروڑ انسانوں کو حقِ آزادی سے محروم کرنا اور اُن کے وطن، سرزمین پر ناجائز قبضہ کے ہوتے دُنیا میں کبھی امن قائم نہیں ہوگا۔ آزادی کی جدوجہد پوری دُنیا کے ضمیر پر دباؤ بڑھاتی رہے گی۔ بانی پاکستان قائد اعظم محمد علی جناحؒ نے پاکستان کی مستقل پالیسی طے کردی کہ ''کشمیر پاکستان کی شہ رگ'' اور ''اسرائیل یورپ کا ناجائز حرامی بچہ ہے''۔

انڈیا کے ناجائز قبضہ اور اسرائیل کے ناجائز وجود کے خاتمہ سے ہی عالمی امن، انسانی حقوق کے احترام کا راستہ کُھلے گا۔ عالمِ اسلام غزہ کے مظلوموں کی قربانیوں کو رائیگاں نہ جانے دیں۔ جماعتِ اسلامی فلسطین میں امریکی اسرائیلی ظلم کے خلاف اور مقبوضہ کشمیر کی جدوجہدِ آزادی، بلوچستان میں حکومتوں سکیورٹی فورسز کے ناجائز اقدامات اور سندھ میں بدامنی کے راج کے خلاف پُرامن عوامی جمہوری مزاحمت جاری رکھے گی۔

لیاقت بلوچ نے نوجوانوں کے سوالات کے جواب میں کہا کہ جماعتِ اسلامی ملک بھر میں ممبر سازی مہم کے بعد عوامی کمیٹیوں کی تشکیل کی مہم شروع کررہی ہے۔ محبِ وطن، باکردار، باصلاحیت، خوددار سیاسی کارکنان جماعتِ اسلامی کا ساتھ دیں، ملک اسلامی اور خوشحال ہوگا۔ معاشی ترقی کے حکومتی دعوے مصنوعی اور اعداد و شمار کا ہیر پھیر جھوٹ پر مبنی اور غبارے میں ہوا کی مانند ہے، جو کسی بھی وقت پھٹ سکتا ہے۔

معاشی پالیسی سازوں اور بااختیار حکمرانوں کو جان لینا چاہیے کہ عالمی سطح پر ممالک پر قرضوں کا حجم 102 ٹریلین ڈالر ہوچکا، ترقی پذیر ممالک کے لیے اب بھیک لینے کی گنجائش بھی ختم ہورہی ہیے۔ پاکستان میں معاشی استحکام کے لیے کرپشن کا خاتمہ، مقتدر اشرافیہ کی عیاشیاں روکنے اور قومی خودانحصاری پر مبنی اسلامی معاشی نظام ہی واحد حل ہے۔ نوجوان روایتی سیاسی، تعصباتی، جذباتی، نمائشی نعرہ بازی سے بغاوت کریں اور باوقار سیاست و انقلاب کے لیے جماعتِ اسلامی کے دست و بازو بنیں۔