اسلام آباد، لاہور سمیت مختلف شہروں میں زلزلے کے شدید جھٹکے

لاہور(اردوپوائنٹ اخبار تازہ ترین۔19اپریل 2025)وفاقی دارالحکومت اسلام آباد ،لاہور ،پشاورسمیت مختلف شہروں میں شدید زلزلے کے جھٹکے محسوس کئے گئے ،زلزلے کے جھٹکے کے باعث لوگوں میں خوف وہراس پھیل گیا اور وہ اپنے گھروں سے نکل آئے اور کلمہ طیبہ کا ورد شروع کر دیا،زلزلہ پیما مرکز کے مطابق زلزلے کی شدت 5.9ریکارڈ کی گئی جبکہ زلزلے کی زیر زمین گہرائی 94 کلو میٹر اور اس کا مرکز افغانستان اور تاجکستان کا بارڈر تھا۔

تاحال کسی جانی یا مالی نقصان کی اطلاع موصول نہیں ہوئی تاہم حکام صورتحال پر کڑی نظر رکھے ہوئے ہیں۔بتایاگیا ہے کہ پی ڈی ایم اے پنجاب کو زلزلے سے متعلق موصول ابتدائی رپورٹس کے مطابق لاہور، راولپنڈی،گجرات، فیصل آباداورپنجاب کے دیگر علاقوں میں زلزلے کے جھٹکے محسوس کئے گئے پنجاب بھر کی انتظامیہ عمارتوں کی چیکنگ میں مصروف ہے، مشینری اور عملے کو الرٹ رکھا گیا ہے۔

(جاری ہے)

اس کے علاوہ زلزلے کے جھٹکے لاہور اور اس کے گردونواح کے شہروں چنیوٹ،پنڈی بھٹیاں،ساہیوال ،اوکاڑہ ،شیخوپورہ ،ٹوبہ ٹیک سنگھ،اسلام آباد، راولپنڈی، صوابی، دیر، سوات، مالاکنڈ اور چترال سمیت کئی شہروں میں محسوس کئے گئے، پشاور، ایبٹ آباد اور بٹ گرام میں بھی زلزلے کے باعث زمین لرز اٹھی۔اس کے علاوہ مردان، مہمند، صوابی،لوئردیر ، کوہاٹ، باجوڑ میں زلزلے کے شدید جھٹکے محسوس ہوئے۔

آزادکشمیر کے علاقے بھمبر سماہنی اور گردونواح میں زلزلے کے جھٹکے محسوس کئے گئے۔ریسکیو اور ایمرجنسی سروسز کو الرٹ کر دیا گیا ہے جبکہ متعلقہ اداروں کو ممکنہ آفٹر شاکس کے پیش نظر احتیاطی تدابیر اختیار کرنے کی ہدایت جاری کر دی گئی ۔بتایا گیا ہے کہ اس کے ساتھ ساتھ ایبٹ آباد،ہزارہ ،سوات ،مالا کنڈ ،دیر،صوابی میں بھی زلزلے کے جھٹکے محسوس کئے گئے تھے۔

واضح رہے کہ دو روز قبل بھی اسلام آباد ،لاہورسمیت ملک کے مختلف شہروں میں زلزلے کے شدید جھٹکے محسوس کئے گئے تھے۔ریکٹر سکیل پر زلزلے کی شدت5.6ریکارڈ کی گئی تھی۔زلزلے کا مرکز افغان علاقے کلفغان سے 108کلو میٹر دور مشرق میں تھا۔زلزلے کے جھٹکے کے باعث لوگوں میں خوف وہراس پھیل گیااور وہ اپنے گھروں سے نکل اور کلمہ طیبہ کا ورد شروع کر دیاتھا۔

تفصیلات کے مطابق پاکستان اور افغانستان میں صبح سویرے زلزلے کے شدید جھٹکے محسوس کئے گئے تھے۔ یورپین میڈیٹرینین سیسمولوجیکل سینٹر کے مطابق ہندوکش ریجن افغانستان میں زلزلے کی شدت 5.6 اور گہرائی 121 کلومیٹر ریکارڈ کی گئی۔زلزلے کے جھٹکے لاہور اور گردونواح، اسلام آباد، راولپنڈی، صوابی، دیر، سوات، مالاکنڈ اور چترال سمیت کئی شہروں میں محسوس کئے گئے تھے۔