جمہوریہ روانڈا کے وزیر خارجہ 21 تا 22 اپریل پاکستان کا دورہ کریں گے، دفتر خارجہ

اتوار 20 اپریل 2025 14:15

اسلام آباد (اُردو پوائنٹ اخبارتازہ ترین - این این آئی۔ 20 اپریل2025ء)ترجمان دفتر خارجہ نے کہا ہے کہ جمہوریہ روانڈا کے وزیر خارجہ و بین الاقوامی تعاون اولیویئر جے پی ندٴْوہٴْنگیرِہے 21 تا 22 اپریل پاکستان کا دورہ کریں گے۔ترجمان دفتر خارجہ شفقت علی خان کی جانب سے جاری بیان میں کہا گیا کہ جمہوریہ روانڈا کے وزیر خارجہ و بین الاقوامی تعاون نائب وزیراعظم و وزیر خارجہ اسحٰق ڈار کی دعوت پر اسلام آباد کا دورہ کریں گے۔

ترجمان کے مطابق روانڈا کے وزیر خارجہ اولیویئر جے پی ندٴْوہٴْنگیرِہے دورہ پاکستان میں اسحٰق ڈار سے ملاقاتیں کریں گے جب کہ یہ دورہ دونوں ممالک کے درمیان تعاون کے نئے مواقع پیدا کرے گا۔شفقت علی خان نے بتایا کہ روانڈا کے وزیر خارجہ وزیر اعظم شہباز شریف اور چیئرمین سینیٹ یوسف رضا گیلانی سے بھی ملاقاتیں کریں گے جب کہ وہ بعض اہم وفاقی وزرا سے بھی ملاقاتیں کریں گے۔

(جاری ہے)

ترجمان دفتر خارجہ نے بتایا کہ وزیر خارجہ اولیویئر جے پی ندٴْوہٴْنگیرِہے اسلام آباد میں جمہوریہ روانڈا کے ہائی کمیشن کا باقاعدہ افتتاح بھی کریں گے۔انہوںنے کہاکہ روانڈا کے وزیر خارجہ کاروباری برادری کے ارکان سے بھی ملاقات کریں گے۔ترجمان دفترخارجہ نے بتایا کہ کیگالی اور اسلام آباد میں متعلقہ سفارتی مشنز کے قیام کے بعد جمہوریہ روانڈا کے وزیر خارجہ کا یہ پہلا سرکاری دورہ ہے۔