u’’ شیر‘‘ کے ساتھ بلاول صاحب کی دوستی ہے،سپیکر پنجاب اسمبلی

}بلاول کی تنقید ووٹرز کو مطمئن کرنے کے لیے ہے،ملک محمد احمد خان ّدونوں جماعتیں حکومت کا حصہ ،اختلافات قابل حل ہیں ،سپیکر پنجاب اسمبلی ملک محمد احمد خان

اتوار 20 اپریل 2025 19:15

حجرہ شاہ مقیم (اُردو پوائنٹ اخبارتازہ ترین - آن لائن۔ 20 اپریل2025ء)سپیکر پنجاب اسمبلی ملک محمد احمد خان نے کہا ہے کہ چیئرمین پیپلز پارٹی بلاول بھٹو زرداری کی مسلم لیگ (ن)پر تنقید ان کی اپنی جماعت کے ووٹرز کو مطمئن کرنے کی سیاسی حکمتِ عملی کا حصہ ہے، انہوں نے کہا کہ مسلم لیگ(ن)اور پیپلز پارٹی کی اپنی اپنی سیاست ہے اور دونوں جماعتوں کی باہمی مخاصمت کی بھی ایک طویل تاریخ ہے، تاہم ملکی مفاد میں دونوں نے ماضی میں اور اب بھی مل کر حکومت چلائی ہے۔

ملک محمد احمد خان گزشتہ روز سجادہ نشین حجرہ شاہ مقیم سید اعجاز علی گیلانی کی وفات پر ان کے بیٹے اور نومنتخب سجادہ نشین سید اسد علی گیلانی اور ایم این اے سید رضا علی گیلانی سے اظہارِ تعزیت کے بعد میڈیا سے گفتگو کر رہے تھے ،بلاول بھٹو کے حالیہ بیان "شیر جب آتا ہے سب کچھ کھا جاتا ہی"پر تبصرہ کرتے ہوئے انہوں نے مسکراتے ہوئے کہا، "اس وقت’’ شیر‘‘ کے ساتھ بلاول صاحب کی دوستی ہی"۔

(جاری ہے)

انہوں نے کہا کہ سیاسی بیانات اپنی جگہ مگر حقائق یہ ہیں کہ دونوں جماعتیں موجودہ حکومت کا حصہ ہیں اور گورننس میں روزانہ کی بنیاد پر ایشوز آتے رہتے ہیں جو باہمی مشاورت سے حل بھی ہو جاتے ہیں،انہوں نے کہا کہ پچھلی پی ڈی ایم حکومت بھی دونوں جماعتوں نے مل کر چلائی تھی اور وہ حکومت اچھی چلی۔ موجودہ سیٹ اپ کو بھی سال، ڈیڑھ ہو چکا ہے، اس دوران کئی معاملات آئے جن پر اختلاف بھی ہوا، جیسے کہ حالیہ نہری نظام کا معاملہ، مگر اس پر بھی گفتگو جاری ہے اور بہتری کی امید ہے۔

پاور شیئرنگ پر بات کرتے ہوئے ملک محمد احمد خان نے کہا کہ اس حوالے سے قائم کمیٹی میں ،میں خود بھی شامل ہوں اور آج بھی پنجاب میں ن لیگ اور پیپلز پارٹی کے درمیان پاور شیئرنگ کے مسئلے پر کمیٹی کی میٹنگ شیڈول ہے۔ انہوں نے کہا کہ "یہ تمام معاملات قابلِ حل ہیں، نیک نیتی سے بات ہو تو کوئی بھی رکاوٹ مستقل نہیں رہتی"۔