پی آئی اے کی پہلی پرواز باکو لینڈ کر گئی، پاکستانی سفیرقاسم محی الدین سمیت دیگراعلی حکام کی جانب سے پرواز اور مسافروں کا والہانہ استقبال

اتوار 20 اپریل 2025 20:30

اسلام آباد (اُردو پوائنٹ اخبارتازہ ترین - اے پی پی۔ 20 اپریل2025ء) پاکستان انٹر نیشنل ایئر لائن (پی آئی اے) کی پہلی پرواز باکو ،آذربائیجان لینڈ کر گئی، باکو کے حیدر علی ائیرپورٹ پر پرواز اور مسافروں کا والہانہ استقبال کیا گیا۔ پی آئی اے کے ترجمان عبداللہ حفیظ خان کی طرف سے جاری بیان کے مطابق آذربائیجان میں پاکستانی سفیر قاسم محی الدین، ڈائریکٹر ائیرپورٹ تیمور حسن اور وزیر ٹرانسپورٹ رشد نبی نے پرواز کا استقبال کیا جبکہ پی آئی اے اور پاکستانی سیاحوں کیلئے نیک تمنائوں کا اظہار کیا۔

دوران پرواز کیک بھی کاٹا گیا اور مسافروں میں تحائف کے ساتھ ساتھ قرعہ اندازی کے ذریعے موبائل فون بھی تقسیم کئے گئے۔ پی آئی اے کی باکو سے لاہور کی پرواز پی کے ۔160 واپسی کیلئے روانہ ہوگئی۔

(جاری ہے)

واضح رہے باکو لینڈ کرنے والی پاکستان انٹرنیشنل ایئر لائن (پی ائی اے) کی لاہور سے باکو کے لئے پہلی پرواز 11 بجکر 50 منٹ پر روانہ ہوئی جسے وزیر دفاع و ہوابازی خواجہ محمد آصف نے لاہور ایئر پورٹ پر الوداع کیا۔

پی آئی اے کی پہلی پرواز پی کے- 159 لاہور سے 152 مسافروں کو لے کر 50۔11 پر روانہ ہوئی جو باکو کے حیدر علی ایئر پورٹ پر لینڈ کر گئی ہے۔ لاہور ایئرپورٹ پر تقریب کے ذریعے تاریخی پرواز کو الوداع کیا گیا ، وزیر دفاع خواجہ محمد آصف الوداعی تقریب کے مہمان خصوصی تھے۔ پاکستان میں آذربائیجان کے سفیر خضر فرہادوف اور وزارت ہوابازی کے اعلی حکام نے خصوصی شرکت کی ۔

اس موقع پر گفتگو کرتے ہوئے وزیر دفاع خواجہ محمد آصف نے کہا کہ کچھ عرصہ قبل لوگوں کا خیال تھا کہ پی آئی اے مشکل سے کبھی باہر نہیں نکل سکے گی تاہم وزیر اعظم کی زیر قیادت جامع اصلاحاتی پروگرام کے بعد آج پی آئی اے اپنے قدموں پر کھڑی ہے۔انہوں نے کہا کہ پی آئی اے اپنے نیٹ ورک کو وسعت دے رہا ہے اور باکو اس سلسلے کی ایک کڑی ہے۔انہوں نے کہا کہ اس پرواز سے پاکستان اور آذربائیجان کے مابین تعلقات مزید مستحکم ہوں گے۔