اقتدار کے حصول کے لیے پیپلزپارٹی نے سندھ کے حقوق اور دریائے سندھ کے پانی کا سودہ کیا ہے،حلیم عادل شیخ

کراچی/سکھر(اُردو پوائنٹ اخبارتازہ ترین - این این آئی۔ 20 اپریل2025ء)کراچی بار کے صدر عامر نواز وڑائچ کی قیادت میں وکلا کی بڑی تعداد نے دریائے سندھ پر چھ کینالوں کے متنازعہ منصوبے کے خلاف ببرلو بائے پاس پر دیئے گئے دھرنے میں ٹی آئی سندھ کے صدر حلیم عادل شیخ کی قیادت میں پارٹی کا ایک بڑا کارواں کراچی سے سکھر پہنچ کر وکلا کے دھرنے میں شامل ہوا۔

پی ٹی آئی کا کارواں کراچی سے صبح روانہ ہوا، جس میں پی ٹی آئی سندھ کے جنرل سیکرٹری ڈاکٹر مسرور سیال، ایم پی اے چودھری اویس، ساجد حسین، پی ٹی آئی رہنما امان قاضی، محسن گھمن، دانیال مگسی، میر افتخار لنڈ، میاں اسلم، مولا بخش سومرو، مشتاق جونیجو، عمران قریشی، امام الدین کیریو، سردار رمضان لنڈ سمیت دیگر رہنماوں اور کارکنوں کی بڑی تعداد شامل تھی۔

(جاری ہے)

کارواں کراچی سے جامشورو، حیدرآباد، مورو اور خیرپور سے گزرتا ہوا ببرلو پہنچا جہاں دریائے سندھ پر چھ کینال کے خلاف جاری دھرنے میں شرکت کی۔ پی ٹی آئی سندھ کے صدر حلیم عادل شیخ نے دھرنے سے خطاب کرتے ہوے کہا کہ اقتدار کے حصول کے لیے پیپلزپارٹی نے سندھ کے حقوق اور دریائے سندھ کے پانی کا سودہ کیا ہے۔وکلا برادری کو سلام پیش کرتا ہوں جو سندھ کے مستقبل کے لیے میدان میں اترے ہیں پورے سندھ کی عوام وکلا برادری کے ساتھ کھڑی ہے کسی صورت میں دریائے سندھ پر کینال بننے نہیں دیں گے سندھ کے پانی کے ایک ایک انچ کا دفاع کریں گے۔

حلیم عادل شیخ نے کہا آصف زرداری صدر مملکت اور وفاق کا حصہ ہیں، پنجاب کا گورنر بھی پ پ کا ہے، زرداری نے سندھ کے پانی پر سودے بازی کر رکھی ہے۔ ایک طرف تو وہ وفاق کے ساتھ معاہدے کرتے ہیں، دوسری جانب عوام کو بیوقوف بنانے کے لیے جعلی احتجاج کرواتے ہیں۔ اگر وہ سندھ کی عوام سے مخلص اور سچے ہیں، تو صدارتی عہدہ چھوڑ دیں اور وفاق سے علیحدگی کا اعلان کریں۔

حلیم عادل شیخ نے کہا دریائے سندھ بچا تحریک کے پلیٹ فارم سے پی ٹی آئی شروع سے ہی سندھ کی عوام کے ساتھ کھڑی ہے۔ عمران خان نے جیل سے پیغام بھیجا ہے سندھ کے ساتھ ناانصافی برداشت نہیں کی جائے گی سندھ کے پانی پر ڈاکے خلاف بھرپور احتجاج کیا جائے۔انہوں نے کہا 26ویں آئینی ترمیم سے عدلیہ کو کمزور کیا گیا، پیکا ایکٹ کے ذریعے صحافت کی آزادی سلب کی گئی، اور اب سندھ کے وسائل کو لوٹا جا رہا ہے۔

ہم کسی صورت دریائے سندھ پر کینال نہیں بننے دیں گے۔انہوں نے کہا پیپلزپارٹی نے 17 سالوں میں سندھ کو لوٹا ہے۔ سندھ میں پولیس گردی، ناانصافیاں، اور بنیادی حقوق کی پامالی اور کرپشن میں اضافہ اور امن امان کی صورتحال خراب ہوئی ہے۔ لیکن اب عوام جاگ چکی ہے سندھ کو مزید لوٹنے نہیں دیں گے۔حلیم عادل شیخ نے اعلان کیا کہ وہ دریا سندھ پر بننے والے چھ کئنالوں کے منصوبے کے خلاف وکلا برادری کے احتجاج کی مکمل حمایت کی ہے کینال منصوبہ ختم ہونے تک دھرنا جاری رہے گا پورے سندھ کی عوام ووکلا برادری کو سلام پیش کرتی ہے اور ساتھ کھڑی ہے